Экономика

Жерүй алтын кенинин жумушчулары «Сарыгулов Дастан байке, Жерүйдөн колуңду тарт!” “Өкмөт өз элиңдин убалына калба”, “Курманбек Бакиев Таластыктарга берген убадасын аткарсын!” “Жумуш ордун жапкандар- эл душмандары” деп жазылган плакаттарды көтөрүп турушту. Алардын айтымында, Геология жана минералдык ресурстар агенттигинин жетекчиси Владимир Зубков баштаган өкмөттүк делегация Таласка барганда, Жерүй алтын кенин башка инвесторлорго бергенче жумушчуларга айлыктарын төлөп беребиз деп убада беришкен экен.Бирок,
экинчи айга айланып баратса да, жумушчуларга убада кылынган эмгек акылары берилген эмес.

Пикетке чыккандар президент Курманбек Бакиев 30-январда Талас облусунун губернатору Жусуп Жээнбековду тааныштырганы барганда, “Таласголдмойнинг” компаниясы Жерүй алтын кенин иштете берерин билдиргенин айтышууда. Алар жаңы өкмөт элди жумуш менен камсыз кылуунун ордуна, иштеп аткан жумуштарынан ажыратууда, дешип нааразы болушууда. Аталган комбинатта жумуштун токтотулушу менен Таласта 500 дөн ашуун адам үйбүлөсүн багуу мүмкүнчүлүгүнөн ажырайт, дейт жумушчу Өзгөн Турдалиев:

-558 адам үйбүлөсүндөгү төрт-беш жанды багып атат. Эгерде булар жумушсуз калышса эки миңден ашуун адамдын жашоосу кыйындайт.

Ушул эле күнү өкмөттө вице-премьер-министр Медетбек Керимкуловдун жетекчилигинде кеңешме болуп, анда Жерүй алтын комбинатына байланыштуу маселени талкуулашты. Өкмөттүн өкүлү Эрмек Мамыралиевдин айтымында, буга байланыштуу атайын комиссия иштөөдө. Өкмөт өкүлдөрү пикетте тургандар менен жолугушуп, алардын сунуштары, талаптары менен таанышып чыкты.

Жерүй алтын кенинин жумушчулары эгерде өкмөт алардын экономикалык талаптарын аткарбаса, нааразылык акциясын саясий мүнөзгө айлантышаарын билдиришти. “Таласголдмойнинг” компаниясынын коопсуздук боюнча менеджер орун басары Таалайбек Изатовдун айтымында алар арызданып эл аралык профсоюз уюмдарына чейин чыгышмакчы.

-Массалык маалымат каражаттарына билдиребиз. Биз муну менен токтоп калбайбыз. Качан бизди өкмөт жумуш менен камсыз кылмайынча нааразылык акциясын уланта беребиз,- дейт Таалайбек Изатов.

Пикетте тургандардын айтымында эгерде өкмөт алардын талаптарын аткарбаса, Таластан дагы 300 ашуун адам келип, нааразылык акциясына кошулмакчы.

Алдыңкы технологияга таянып, экономиканы жана элдин жашоосун жакшыртуу айыл чарба азыктарын жана чийки заттарды экспорттоого ыңгайлашкан Борбор Азия өлкөлөрү үчүн өтө актуалдуу маселе. Бул абалдан чыгуу үчүн, Аннетте Диксон айымдын айтышынча, регион өлкөлөрү түрдүү тармактарды өнүктүрүшү абзел жана айыл чарбасындагы өндүрүмдүлүктү, анын натыйжасында кирешени көбөйтүүсү зарыл :

-Айыл чарбасында жаңы технологияны колдонуу менен продукцияны базарга ылайыктыштыруу пайданы чоң алып келет, андан кыштак элинин турмушу да жакшырат.

Борбор Азиянын айыл калкы батыштык фермерлер сыяктуу кымбат техниканы сатып алууга кудурети жетпейт. Мындай жагдайда, дыйкан чарбалары заманбап технологияны сатып алуусу үчүн улуттук өкмөттөр тышкы инвестицияны пайдаланганы жөндүү.

- Анын бир жолу, албетте, табигый байлыктарды өздөштүрүүгө чет элдик инвесторлорду тартуу. Борбор Азиянын жерлери айыл чарба азыктарын өстүрүүгө абдан ыңгайлуу болгондуктан алар өндүрүмдүүлүктү алдыңкы технологияны колдонуп жогорулатышса болот. Бул ишти техниканы өтө жөнөкөй жолдор менен жакшыртып, модернизациялап, орто баадагы жаңы технологияны сатып алып, жасаса да болот.

Аннетте Диксондун сөзүнө караганда, Дүйнөлүк банк Борбор Азия өлкөлөрүнө эки багытта иш алып барууда:

-Дүйнөлүк банктын эки колу бар. Бир колу Эл аралык финансылык корпорация аркылуу жеке менчик секторго кредит берет. Экинчи колу жеке менчик инвесторлорду Кыргыз Республикасы сыяктуу өлкөлөр менен иштөөгө тартат жана аларга ыңгайлуу инвестиция табууга жардамдашат. Ошол эле мезгилде биз өкмөттөр менен чет элдик инвестиция үчүн ылайыктуу укуктук чөйрө түзүү жана жаңы инвесторлорду тартуу боюнча иш жүргүзөбүз.