Экономика

Япон парламенти премьер-министр Юничиро Койзуми мамлекеттик чыгымдарды кыскартуу планын бекитти

Дүйшөмбү күнү япон парламентинин Жогорку палатасы өпчүлүк добуш менен 2006-чы финансылык жылда мамлекеттик чыгымдарды 3 процентке же 686 миллиард долларга кыскартуу жөнүндө мыйзам кабыл алды. Мыйзамды мурда Өкүлдөр палатасы бекиткен. Японияда финансылык жыл 1-мартта башталат.
Бюджетте жаңы заемдер 30 триллион иенеге аз чыгарылаары каралган. Бул өкмөт карыз алууну 30 триллионго кыскартат дегенди билдирет.

Декабрда япон өкмөтү аскерий чыгымдар жана чет өлкөлөргө көрсөтүлчү жардам кыскартылаарын, бирок киреше салыгы көбөйтүлө турганын эскерткен
Койзуминин өкмөтү эми администартивдик жана фискалдык реформа боюнча талкууну баштайт. Анын максаты бюджеттен каржыланган мекемлердин жана мамлекеттик чиновниктердин санын кыскартуу.
Азыр Япониянын мамлекеттик карызы ички дүң продукциядан 1, 6 эсеге көп.


2006-жылы Кытайдын экономикасы 8, 9 процентке өсөт деп болжолдонууда

Былтыр өлкөнүн экономикасы 9, 9 процентке өскөн. Бул жөнүндө Кытайдын Улуттук банкы маалымдады. 2004-жылы Кытайдын экономикасы 10, 1 процентке өскөн. Ырасмий Бээжин турак жай курулушуна, экологиялык таза долбоорлорго,ошондой эле металлургия жана цемент өндүрүшүнө инвестиция тартуу үчүн өнөр жайдын башка тармактарынын ылдам өстүрбөө аракетин кылууда. Ошон үчүн, өкмөттүн беш жылдык планы боюнча 2010-жылы орточо экономикалык өсүш 7, 5 процент болуш керек.


Эл аралык базардагы мунайды баасы өсүүсүн токтотту

Дүйшөмбү күнү Лондондун биржасында кардарларга май айында жеткирилчү мунайдын баасы 14 центке арзандады. Баанын арзандашына, эксперттердин айтымында, нигериялык согушчандардын мунай ишканасында иштеген үч жумушчуну бошотуусу себеп болду. Анткен менен, дүйшөмбү күндүн таңында Нью-Йорктун биржасында мунай 12 центке кымбаттап, 64 доллар 38 центке чыккан. Бирок, баа түштөн кийин 22 центке ылдыйлады. Бир баррель 139 литрге барабар.
17 - мартта Нигерияда италиялык ENI мунай компаниясынын кууруна чабуул жасалгандан кийин, өлкөдө кара май өндүрүү 75 миң баррелге кыскарган. Ошондон улам, ENI компаниясы айрым келишимдер аткарылбай калаарын эскерткен болчу.


Бүгүн АКШнын Улуттук банкы долларынын кубатын аныктоочу чечим кабыл алат

АКШнын Борбордук банкын эки күндүк жыйыны өтүүдө. Шейшемби күнү аяктачу жыйында банк жетекчилиги насыя акчага төлөнчү кайтарым пулдун процентин 4, 75 процентке чейин көтөрүү жөнүндө чечим кабыл алат деп күтүлүүдө.


Алтындын баасы 10 долларга кымбаттады

Кечээ Гонкогдун биржасында бир унций алтындын баасы 559 доллар 70 центке чейин жетти. Бул жума күнгө салыштырганда дээрлик 10 долларга кымбат.
1 унций 31,1 граммга барабар.

Баш-аягы 30 гектирге жакын жерди ээлеген, буга кошумча 15 чакырым алыстыктагы Аксай кенинен майдаланган ташты конвейер аркылуу ташып келүүгө эсептелген Кызылкыядагы цемент заводу Борбор Азиядагы жаңы типтеги өнөр жай ишканасы болмокчу. Социализм тушунда курулган Казакстан менен Өзбекстандагы 8, Кыргызстандагы Кант цемент-шифер заводдору нымдуу ыкма менен иштеп, иштетилгенден калган түтүн аралаш чаңды такай абага бүркүп турат.

Кызылкыядагы завод экологиялык жагынан таза, жаңы технологиялык жетишкендиктерди көргөзчү ишкана. Заводдун башкы директору Ян Фишер 80-жылдары Кызылкыяда цемент заводун куруу планга киргизилип, бирок да социализм урап калгандан кийин демилге унутта калган дейт.

- Бул долбоор, менин оюмча, Кыргызстанда курулган жана курула турган эң ири объект болмокчу.

Кыргызстандагы ири курулуштардын дээрлик баарынын башында турган тажрыйбалуу куруучу Ян Фишер социализм заманында алдагыдай ири ишкана кеминде 4 жылда курулуп бүтмөк эле деп билдирди. 14 айдын ичинде бүткөрүлчү ири курулуш комплекси бир убакта башталат.

- Биз бардык ишти бир убакта жасайбыз. Сырьену кабыл алуудан тарта чыгарылган цементти жүктөөгө чейин баарын чогуу жасайбыз,- дейт Ян Фишер.

Цемент заводунун жерпайын даярдаш үчүн 1 миилион тонна топурак сыртка ташылып чыгышы керек. «Инэксимбанктын» президенти Данияр Үсөнов жаңыдан ишке киргизип жаткан долбоорун каржылоого Кытайлык CAMC компаниясы 80 миллионго жакын доллар акча бөлүүгө макул болуп, заводдун жабдуулары жай айында келе тургандыгын маалымдады. Заводдун долбоорлоо жумуштары 9 айдын ичинде бүткөрүлдү. Кызылкыядагы цемент заводу артынан кошумча ишканаларды да ала келет.

- Жаңы сунуштар болуп жатат. Ал жерге гипсокартон чыгара турган дагы бир завод куруш керек. Азыр курулуштун баары гипсокартон менен болуп атпайбы. Фергана өрөөнүндө андай завод жок. Казактарда бар. Өзбектерде, бизде жок. Ошон үчүн ошол долбоорду да ойлоп жатабыз. Заводдун эки линиясы иштеп калса ар бир күнү 100 вагон жөнөтүшүбүз керек. Ал үчүн темир жолду оңдоо, ташуучу составды жаңылообуз керек.

Данияр Үсөновдун айтуусунда, буга кошумча көмүр өнөр жайын жаңылоо, башка курулуш материалдарын чыгаруу цемент заводунун курулушу менен кошо жүрмөкчү. Кытайдын CAMC компаниясынын вице-президенти Ванг Бо жаңы долбоор Кыргызстан үчүн өзгөчө маанилүү иш деп айтты.

- Бул абыдан маанилүү долбоор деп эсептейм, себеп дегенде, курулушка эң керектүү цемент чыгаруучу завод курулганы турат. Завод 2 миллион тонна цемент чыгарууга эсептелген.

Кыргызстандын Экономика жана каржы министри Акылбек Жапаров цемент заводу ишке киришсе 5 миңге жакын киши иш менен камсыз болор эле деген пикирде.

- Завод буюрса ишке ашып кетсе, быссымылда, дегенде эле 1000 жакын киши иштеп жатат. Ар бир үйдө бештен киши болсо, 5000 кишинин күнүмдүк оокаты, жумушу дагы пайда болуп атат.

Кызылкыянын тоо жактагы төштүү беттеги чакан Жинжиген айлынын жанына түшүп аткан заводдун курулушуна көпчүлүк менен кошулуп тестиер балдар да кызыкдар.

- Ушул жерде иштеген жакшы да, - дейт заводко коңшу айылдын өспүрүмү.

Кыйла жылдан бери болгон өндүрүштүн кыйласын талап-тоноп жок кылган кыргызстандыктар жаңы заводдун курулушуна өзгөчө маани беришкенин аземге келген Ош менен Баткен облусунун кылкылдаган калкы айгинелеп турду.