Улуттук коопсуздук боюнча мамлекеттик комитетинин (УКМК) төрагасы Камчыбек Ташиев Кыргызстанда сөз эркиндиги бар деп эсептейт. Атайын кызматтын жетекчиси бул тууралуу 5-декабрда Жогорку Кеңеште депутат Элдар Абакировдун суроосуна жооп берип жатып билдирди.
Кыргызстанда коррупцияга айыпталгандарга жазаны күчөтүү боюнча мыйзам долбоору талкууланып жатканда Элдар Абакиров жемкорлук менен күрөшүүдө сөз эркиндиги да маанилүү экенин, журналисттик иликтөөлөрдөн кийин бир катар коррупциялык иштердин бети ачылганын айтты.
“Кыргызстанда журналисттерге толук эркиндик бар. Эмнени жазса жаза берсин. Бирок Кыргызстанга бүлүк салбаш керек. Ошондуктан бүлүк салгандарды биз тартипке чакырдык, мындан ары да чакырабыз”, - деп жооп берди Камчыбек Ташиев.
Кыргызстан Freedom House, Human Rights Watch (HRW) сыяктуу бир катар эл аралык уюмдардын акыркы баяндамасында төртүнчү жылы катары менен “эркин эмес” мамлекет деп аталды. Буга өлкөдө саясий укуктар чектелип, маалымат каражаттары кысымга туш болгону негиз кылынган.
Кыргызстанда 2021-жылы “Анык эмес (жалган) маалыматтан коргоо жөнүндөгү” мыйзам кабыл алынган. Бул мыйзам боюнча ЖМКга чыккан кайсы бир маалымат боюнча арыз түшсө Маданият, маалымат, спорт жана жаштар саясаты министрлиги соттун чечими жок эле медианын ишин эки айга токтотуп, сайтын бөгөттөп коё алат.
Бишкектин Ленин райондук соту 10-октябрда Temirov Live жана “Айт айт десе” долбоорунун жетекчиси Махабат Тажибек кызын алты жылга, “Айт, айт десе” долбоорунун кызматкери Азамат Ишенбековду беш жылга абакка кескен.
Журналисттер Актилек Капаровго жана Айке Бейшекеевага үч жылдан пробациялык жаза берилип, эки журналист сот залынан бошотулган. Калган жети журналисттин аракетинде кылмыштын курамы жок деген негизде акталган.
11 журналистке Кылмыш-жаза кодексинин 278-беренеси – “Массалык башаламандыктар” менен айып тагылып, алар коюлган кинени четке кагышкан.
Социалдык тармактарда өзүнүн пикирин жазганы үчүн соттолуп же кылмыш иши козголуп, сот жообуна тартылгандар же тергөө абагында отургандар да бар. Коррупцияга каршы бир катар иликтөөлөрү менен таанылган “Клооп Медиа” коомдук фонду сот чечими менен жабылган. (BTo)
Дагы караңыз
УКМК төрагасы салыкчылардын иши боюнча дагы кармоолор болушу мүмкүн экенин айттыТашиев коррупцияга каршы мыйзам саясий куугунтукка курал болбой турганын билдирди ЖК Сабировду социалдык камсыздоо министри кызматына жактырдыТашиев коррупция менен кармалгандардын 80% акча төгүп абактан чыгып кеткенин билдирди Франциянын парламенти өкмөткө ишеним көрсөткөн жок4-декабрь: Кыргыз-тажик чек арасы такталганы жарыяланды, Грузияда оппозиция лидери кармалды