Бишкектин Биринчи май райондук сотунда Кемпир-Абад иши боюнча өкүм чыгаруу үчүн ишти караган судья Марат Сыдыков кеңешүү бөлмөсүнө кетти. 14-июндагы отурумда айып коюлган саясатчы жана активисттер акыркы сөзүн сүйлөштү. Алар судья акыйкат чечим чыгарып, актайт деп күтүп жатышканын айтышты.
Айып коюлгандардын жакындары Биринчи май райондук сотунун алдында сот адилеттигин талап кылып турушат.
Кемпир-Абад иши боюнча башта 27 кишиге айып тагылып кармалган. Алардын ичинен 22 киши акыркы сөзүн сүйлөштү. Алар: Равшан Жээнбеков, Азимбек Бекназаров, Жеңиш Молдокматов, Айданбек Акматов, Марат Баязов, Айбек Бузурманкулов, Илгиз Шаменов, Тимур Махмудов, Рита Карасартова, Клара Сооронкулова, Али Шабдан, Эрлан Бекчоро уулу, Асия Сасыкбаева, Гүлнара Журабаева, Перизат Суранова, Улукбек Маматаев, Таалай Мадеминов, Чыңгыз Капаров, Нурлан Асанбеков, Атай Бейшенбек, Акыл Айтбаев жана Мамбетжунус Абылов.
Ал эми Орозайым Нарматова менен Талантбек Эшалиевдин иши буга чейин эле өзүнчө өндүрүшкө алынган. Ден соолугуна байланыштуу дарыланып жаткандыктан саясатчылар Кеңешбек Дүйшөбаев менен Бектур Асановдун жана Жогорку Кеңешке шайлоого талапкер болгон Кубанычбек Кадыровдун да иши жакында эле өзүнчө бөлүндү.
10-июндагы жараянда прокурорлор соттон Кемпир-Абад иши боюнча айыпталып жаткан саясатчы жана активисттердин ар бирин 20 жылдан абакка кесип, мүлкүн конфискация кылуу жазасын сураган.
Кыргыз-өзбек чек арасындагы Кемпир-Абад суу сактагычынын жери Өзбекстанга өтүп жатканына каршы пикирин билдирген 27 саясатчы, активист жана укук коргоочулар 2022-жылы октябрда камалган. Ушул тапта кармалгандардын ичинен сегиз киши тергөө абагында жатат. Калгандары түрдүү жагдайда эркиндикке чыккан.
Кемпир-Абад иши 2023-жылы июнь айында сотко өтүп, Ички иштер министрлигинин (ИИМ) Тергөө башкармалыгы ишке “жашыруун” грифин койгон. Милиция аларга Кылмыш-жаза кодексинин “Массалык башаламандыктар” жана “Бийликти күч менен басып алуу” беренелери менен айып таккан.
Шектүүлөр мунун баарын саясий куугунтук катары сыпаттаган. Соттук жараяндар жабык өттү. (BTo/TSh)
Дагы караңыз
"Ислам мамлекетин" үгүт кылган 15 киши кармалганы кабарландыСербия белорус оппозиционер активистин Минскиге экстрадициялайтКытай-Кыргызстан-Өзбекстан темир жолуна туш келген айылдар көчүрүлөтИранда абактагы активист аялга дагы 18 жылдык жаза мөөнөтү чегерилдиAI уюму бийликти “кемпирабадчыларды” бошотууга чакырды"Кытай-Кыргызстан-Өзбекстан" темир жолун куруу үчүн үч өлкө биргелешкен компания түзөтОрусияда кармалган америкалык журналист Гершковичтин иши сотко өттү Баткенде эки жашар кызды сабоого шектүү тергөө абагына камалды