Бүгүн, 31-августта Кыргызстандын эгемендигинин 33 жылдыгы майрамдалып жатат. Быйыл Көз карандысыздык күнүнөн тышкары, Кара-Кыргыз автоном облусунун түзүлгөнүнүн 100 жылдыгы да белгиленүүдө.
Буга байланыштуу азыркы учурда Бишкектин Ала-Тоо аянтында негизги майрамдык салтанат өтүп жатат. Анда сахналаштырылган оюн-зооктор коюлуп, жергиликтүү жана чет элдик ырчылар өнөрлөрүн тартуулай турганы айтылган.
Майрамдык иш-чарага мамлекет башчы Садыр Жапаров баштаган бийлик өкүлдөрү, Бишкектин тургундары жана коноктору күбө болууда.
Жогорку Кеңеш 1991-жылдын 31-августунда өлкөнүн Эгемендик күнүн жарыялаган. Быйыл андан тышкары Кара-Кыргыз автоном облусунун түзүлгөнүнө 100 жыл болду. Орус Советтик Федеративдик Социалисттик Республикасынын (РСФСР) курамындагы Кара-Кыргыз автономиялуу облусу 1924-жылы 24-октябрда түзүлүп, 1925-жылы май айында Кыргыз автономиялуу облусуна айланган. Аталган түзүм 1926-жылы Кыргыз АССРи деп өзгөртүлүп, 1936-жылдан тартып Кыргыз ССРи болгон.
