Жогорку Кеңештеги КСДП фракциясынын лидери Иса Өмүркулов өкмөттүн маалыматтык коопсуздукту камсыз кылуу жаатындагы ишин жетишсиз деп баалап, сынга алды. Ал өлкөдө маалымат айдыңы кароосуз калып, тышкы социалдык түйүндөр балдардын аң-сезимине чейин таасир берип жатканын кошумчалады.
- Буга өтө олуттуу мамиле кылуу керек. Окумуштууларыбызды илимий жактан көмөктөшүүгө тартуу, тиешелүү кызматкерлердин айлык акысын көтөрүү, теле-радио аркылуу каршы аракеттерди көрүү, заманбап жабдууларды сатып алуу, өнөктөш өлкөлөр менен бул жаатта кызматташуу сыяктуу комплекстүү чаралар көрүлүшү кажет.
Фракция 30-ноябрда өкмөттүн маалыматтык коопсуздукту камсыз кылуу жаатында ишмердүүлүгү тууралуу маалыматын укту. Анда вице-премьер-министр Жеңиш Разаков, Улуттук коосуздук боюнча мамлекеттик комитеттин төрагасынын орун басары Асылбек Кожобеков, Маалыматтык технологиялар жана байланыш мамлекеттик комитетинин төрагасы Бакыт Шаршембиев баяндама жасашты. (КЕ)
