Чүйдө мектеп окуучусуна кол көтөргөн директор ишинен алынды. Бул тууралуу бүгүн акыйкатчынын кеңсеси кабарлады.
Мекеменин маалыматына караганда, окуя быйыл май айында Аламүдүн районунун Кой-Таш айылында болгон. Кой-Таштын мектебинин директору Венера Чылпакбаева мугалимдердин жана окуучулардын көзүнчө 6-класста окуган балага кол көтөргөн.
Баланын ата-энеси Билим берүү жана илим министрлигине арызданып, натыйжада директорго сөгүш жарыяланган. Бирок кийин прокуратуранын жана акыйкатчынын кеңсесинин кийлигишүүсүнөн кийин дагы кошумча териштирүү жүрүп, Чылпакбаева кызматынан алынды.
