Жалал-Абад шаарында 275 орунга ылайыкташкан эки кабаттуу №6 мектептин жаңы имараты пайдаланууга берилип, 30-августта анын ачылышы болду.
2014-жылы авариялык абалдагы бул мектепте окуган 300дөн ашык бала №7 мектептин имаратына көчүрүлүп, ошол жакта билим алып келген.
Ошол кездеги бийликтин тапшырмасы менен 2014-жылы башталган мектептин курулушуна 59 миллион сомго чукул каражат сарпталган. Акча тартыштыгынан улам курулуш өз мөөнөтүндө бүтпөй калганы айтылды.
Жалал-Абадда 20 орто мектеп бар. Жергиликтүү бийликтин маалыматына караганда, шаарда дагы беш мектеп салуу пландалууда.
Ал эми Жалал-Абад облусу боюнча быйыл жыл аягына чейин беш мектеп пайдаланууга берилери күтүлүүдө. (RsK)
