Ысык-Көл облусунда эс алуучулардын буюмдарын уурдап жүргөн адамдардын тобу кармалды. Бул тууралуу "Азаттыкка" Ысык-Көл облустук милициянын басма сөз катчысы Сталбек Усубакунов билдирди. Анын айтымында, шектүү катары эки киши кармалды.
20-июлда Ысык-Көл облустук милициясына Бишкек шаарынын 52 жаштагы тургуну арыз менен кайрылган. Анда ушул эле күнү саат 19:00 жана 20:10 чамасында белгисиз адамдар «Алтын-Кум» пансионатындагы анын бөлмөсүнө кирип, «Самсунг С7», «Самсунг NOT 4» үлгүсүндөгү эки чөнтөк телефонун жана «Самсунг Йога» үлгүсүндөгү ноутбугун уурдап кетишкенин билдирген. Мындан улам ал 90 миң 500 сом зыянга учураганы айтылган.
Аталган факты боюнча Кылмыш-жаза кодексинин 164-беренеси (“Уурдоо”) менен кылмыш иши козголуп, милиция кызматкерлеринин аракети менен кылмыштын бети ачылган. Шектүү катары Балыкчы шаарынын тургундары —35 жаштагы Ж.К. жана 22 жаштагы Ж.А. кармалды. Алар буга чейин уурулук фактысы боюнча соттолушкан.
Шектүүлөр убактылуу кармоочу жайга киргизилди. (AsM)
