Бишкек райондор аралык соту «Кумтөр голд компани» ишканасынан жер салыгы үчүн 45 миллион сомдон ашык каражатты мамлекетке өндүрүү жөнүндө чечим чыгарды. Канадалык ишкана бул чечимди соттун кийинки инстанциялары аркылуу жандырууну максат кылууда.
Президенттик администрациянын башчысы Үсөн Сыдыков Кыргызстандын экс-президентинин жубайы Майрам Акаеваны сотко берди. Муну айрым талдоочулар мамлекеттик администрация башчысынын упай топтоо максатын көздөгөн саясий кадамы катары баалап жатышат.
15-февралда Бишкек райондор аралык соту «Кумтөр голд компани» жабык акционердик коомунан жер салыгын өндүрүп берүүнү сураган доо арызды кароого киришти. Доо арызды Жогорку Кеңештин депутаты Кубанычбек Исабеков менен Жетөгүз райондук мамлекеттик администрациясы берген.
Жогорку Кеңештин жетекчилигинин кызматтан кетүү чечимине келишине парламенттик көпчүлүктүн азыркы бийликтин саясаты менен келише албастыгы себеп болду. Жогорку Кеңештин төрагасы Өмүрбек Текебаев дүйшөмбүдө коомчулукка тараткан баяндамасында ушундай көз карашын билдирип, президенттин дарегине айткан сөзүн шылтоо катары белгиледи. Бирок, айрым талдоочулар төраганын кызматтан кетишине башка жол менен актоого мүмкүн болбогон одоно катачылык себеп болгонун белгилешүүдө.
Жекшембиде, 5-февралда Искра айылында дунган жана кыргыз улутундагы адамдардын ортосунда чыр-чатак ырбап, ок атылып, үй-жайлар таш бараңга алынып, өрт коюлуп, улут аралык чоң кагылышуу чыгып кете жаздады. Чатакты басууга милиция күчтөрү жиберилип, граната,тапанча менен куралданган төрт дунган кармалды. Айылдын жашоочулары балдары зөөкүрлүк кылып тажатты деп дунган үй-бүлөнүн алты адамынын айылдан көчүп кетишин талап кылышууда. Эки күндөн бери бул жакта болуп жаткан чыр-чатактарды тынчытуу максатында жергиликтүү калктын, бийликтин, коомдук уюмдардын өкүлдөрү өз ара сүйлөшүү жүргүздү.
Кыргызстандын президенти Курманбек Бакиевдин саясатын эми атайын түзүлгөн ыктыярдуу коом колдомой болду. Коомду адилет министрлиги 16-январда каттоого алган. Бирок, мындай уюмдун түзүлүшүн коомчулуктун айрым өкүлдөрү президент Бакиевге пайдадан зыянды көп алып келе турган орунсуз кадам катары баалашууда. Муну экс-президент Аскар Акаевдин ушул өңүттөгү таржымалы менен көбүрөөк байланыштырып жатышат.
Коопсуздук кызматынын башчысы Таштемир Айтбаев кызматтан кетеби-кетпейби – бул маселенин кыйла тыныгуудан кийин кайра көтөрүлүшүнө анын кол алдындагы кызматкеринин ички иштер кызматы тарабынан кармалышы шылтоо болду. Кыргызстандын башкы чекистин кызматтан кетирүүнү президентке парламент, жарандык коом бир нече ирет сунуштаган. Президент парламенттин акыркы сунушуна өз оюн айта элек. Кээ бир талдоочулар Коопсуздук кызмат башчысына байланышкан жаңжалды президент Коопсуздук кеңеши аркылуу чечиши ыктымал деп болжошууда.
Кыргызстанда улам барган сайын оор кылмыштын саны өсүп баратат. Айрыкча буюртма киши өлтүрүү токтогон жери жок. Ага каршы милиция кантип күрөшүшү керек? Бул коомчулук козгогон олуттуу маселелердин бирине айланды.
Жогорку Кеңеш «Манас» аба майданы турган жер аянтын толугу менен мамлекеттин карамагына өткөрүүнү шарттаган мыйзам долбоорун даярдоого киришти. Төрага Өмүрбек Текебаевдин демилгесинде даярдала баштаган бул долбоор кабыл алынса, “Манаста» жайгашкан чет өлкөлүк аба-аскерий база жер үчүн ижара акысын айрым юридикалык тараптарга эмес, мамлекетке төлөп калат.
Президент Курманбек Бакиевдин абийир, ар-намысын коргоо максатында айрым журналисттерге жана саясатчыларга Бишкек шаар прокурорунун берген эскертүүсү коомчулукта аша чабуу катары сыпатталып жатат. «Демократия жана жарандык коом үчүн» коалициясы муну өлкөдөгү кризистик жагдай үчүн жоопкерчиликти мамлекеттик органдар маалымат каражаттарынын мойнуна коюу аракетин жасап жатат деп баалады.
Кыргызстанда кезектеги референдум 2006-жылдын акыркы үч айынын бирине белгиленип, анда эл өлкөнү башкаруунун формасын аныктайт. Мамлекет башчы муну тастыктаган жардыгын 5-январда чыгарган. Бирок, азыркы бийлик өзүнүн ордун бекемдөө аракетин жасап жатат деп санаган айрым саясий күчтөрдүн баамында референдум коомду кайрадан чыңалууга кирептер кылышы ыктымал.
Кыргызстанда демократиялык күчтөрдүн элдик коалициясы түзүлдү. Коалициянын уюштуруу жыйыны 6-январда Бишкек шаарында өтүп, анда уюмга жети саясий партия, эки саясий кыймыл жана 9 бейөкмөт уюм бириккендиги жарыяланды. Алардын катарында Социалисттик «Ата мекен», «Арнамыс», «Социал-демократтар», «Кайран эл», «Менин өлкөм», «ДКБ», «Элдин эрки» партиялары бар.
Президент Курманбек Бакиев 30-декабрда коррупцияга каршы иштей турган улуттук кеңештин төрт мүчөсүн бекитти.Коопсуздук кеңешинин чечимине ылайык президент 21-октябрда коррупцияга каршы күрөш боюнча агенттик жана улуттук кеңеш түзүү тууралуу жардык чыгарган. Ушул эле максатты көздөгөн эки уюм мурдагы бийликтин тушунда да иштеп келген. Азыркы бийлик коррупцияга каршы күрөштө кандай өзгөчөлүктөргө ээ болушу мүмкүн?
Жаңы жыл алдында «Analitik.kg» интернет сайтына Кыргызстандын экс-президенти Аскар Акаев интервьюсу жарыяланды. Анда Акаев илим тармагына биротоло кеткенин билдирди. Бирок, негизги көңүл Кыргызстандагы жагдайга бурулуп, жаңы бийликке антиакаевчил моралдык террорду токтотуу сунушталган.
Кыргызстандын президенти Курманбек Бакиев жергиликтүү теле берүүлөр аркылуу Кыргызстандын калкын жаңы жылы менен куттуктады. Март окуясынан кийин шайланган мамлекет башчы жаңы жылдык алгачкы куттуктоосунда элдин үмүтүн актоого убадасын берди.
Качкындар иштерин жүргүзгөн мекеменин жоюлушу Кыргызстанды эл аралык деңгээлдеги чыр-чатакка кирептер кылат. Өлкөдөгү бир катар укук коргоочу уюмдар ушундай мазмундагы кайрылуу менен чыгышты. Ал эми тышкы иштер министрлигиндеги структуралык кайра түзүүлөрдө бул маселе эске алынгандыгы байкалган жок.
Кыргыз бийликтери мурдагы президент Аскар Акаевдин уулу Айдарды өткөрүп берүү өтүнүчү менен орус бийликтерине кайрылды. Айдар Акаев бир катар экономикалык кылмыштарды жасаган деп шектелип жатат. Бул тууралуу Кыргызстандын баш прокурору Камбараалы Конгантиев журналисттерге маалымдады. Пресс-жыйында Казак бийликтерине өткөрүлүп берилген оппозиционердин да тагдыры талкууланды.
Оор кылмыш жасагандыгынан шектелген кыргызстандык 9 атуулдун ишин кароо 23-декабрда 1-май райондук сотунда улантылды. Рысбек Акматбаев баштаган бул топ үч адамды өлтүрдү жана бир адамдын өмүрүнө кол салды деп шектелүүдө. Бул күнкү сот отурумунда айыпталуучуларды суроо башталды.
Жогорку Кеңеш Конституциялык реформага байланышкан күн тартибиндеги маселени жума күнү талкуулабай калды. Бул сессияда кворумдун жоктугу менен түшүндүрүлүп, маселеге келерки дүйшөмбүдө кайрылуу чечими кабыл алынды. Бирок, айрым саясатчылар депутаттардын мындай жайбаракаттыгын реформаны болтурбоону каалаган ак үйдүн саясатына кылчактоо катары сыпаттап жатышат.
Март окуясынан кийин кайра түзүлгөн «Кыргызстан» биримдиги революциялык максаттардын экинчи этабын ишке ашырууга кызыкдар жана ушул максатта 6-курултай өткөрүүнү көздөп жатат. Бирикменин координациялык кеңешинин төрага милдетин аткаруучу Азимбек Бекназаровдун мындай демилгесине карата коомдук-саясий чөйрөдө ар кыл көз караштар пайда болду. Ириде мындай демилге бирикмеге мүчө айрым саясий партиялардын нааразылыгын жаратууда.
Дагы жүктөңүз
