Кыргызстандын тышкы иштер министри Жээнбек Кулубаев Америка Кошмо Штаттарындагы президенттик шайлоонун алдын ала жыйынтыгы тууралуу “Азаттыкка” берген комментарийинде АКШ менен кызматташтык жөнүндө макулдашуу боюнча сүйлөшүү уланып жатканын айтты.
“Биз көп тараптуу байланышты өнүктүрүп жатабыз. АКШ менен болгон кызматташтык да биз үчүн артыкчылыктуу багыттардын бири. Шайлоонун расмий жыйынтыгы чыккандан кийин кызматташтыкты кандай улантабыз, көрөбүз. АКШ менен азыр саясий диалог бар. Макулдашуу боюнча дагы иштеп атабыз”, - деди ал.
АКШнын көптөгөн жалпыга маалымдоо каражаттары, анын ичинен Associated Press жана CNN маалымдагандай, 5-ноябрдагы шайлоонун баштапкы жыйынтыгы менен Дональд Трамп жеңишке жетүү үчүн зарыл болгон шайлоочулар коллегиясынын 270ден кем эмес добушун алып, атаандашы Камала Харристен озуп чыкты. Соңку маалыматтар боюнча Трампка берилген добуштардын саны 277 болду.
Кыргызстандын президенти Садыр Жапаров Дональд Трампты Америка Кошмо Штаттарынын президенттигине шайланышы менен куттуктап, телеграмма жолдоду.
Кыргызстан менен АКШнын ортосундагы кызматташтык жөнүндө макулдашууга 1993-жылы 19-майда Вашингтондо кол коюлган. Стратегиялык документти кыргыз өкмөтү 2015-жылы 21-июлда бир тараптуу денонсациялаган.
Жаңы макулдашуу тууралуу сөз 2017-жылдан бери айтылып келет. Бирок азырынча ага кол коюла элек. (BTo/TSh)
Дагы караңыз
Бишкек түрк дүйнөсүнүн санарип, Жалал-Абад туризм борбору деп аталдыТрамп шайлоочулар коллегиясынын 270тен көп добушун алып, жеңишке жетти Эрдоган түрк тилдүү мамлекеттерге орток алфавитке өтүү сунушун бердиЖапаров: Кыргызстан палестин-израил жаңжалын тынчтык жол менен чечүүнү колдойт Дүйнө лидерлери Трампты жеңиши менен куттуктап жататФутбол: “Абдыш-Ата” үчүнчү ирет Кыргызстандын чемпиону болду