2025-жылы Бишкек шаары Түрк мамлекеттер уюмунун санариптик, Жалал-Абад шаары туристтик борбору деп аныкталды. Мындай чечим 6-ноябрда Түрк мамлекеттер уюмунун (ТМУ) саммитинде кабыл алынганын жыйын соңунда Кыргызстандын тышкы иштер министри Жээнбек Кулубаев билдирди. Анын айтымында, президент Садыр Жапаровдун демилгеси менен климаттын өзгөрүүсүнө байланыштуу Түрк мамлекеттеринин өз ара аракеттенүүсүн чыңдоого багытталган документ кабыл алынды.
ТМУнун Баш катчысы Кубанычбек Өмүралиев саммит алкагында жалпысынан 16 түрдүү документке кол коюлганын белгилеп, түрк кызматташтыгын бекемдөөгө салым кошо турганын билдирди.
Уюмдун 6-ноябрда Бишкекте өткөн саммити “Түрк дүйнөсү: экономикалык интеграция, туруктуу өнүгүү, баары үчүн санарип келечек жана коопсуздук” деген аталышта өттү.
Ушуну менен ТМУга 2025-жылы төрагалык кылуу Казакстандан Кыргызстанга өттү.
Саммитке беш мүчө – Түркия, Азербайжан, Казакстан, Кыргызстан жана Өзбекстандын жетекчилери, ошондой эле уюмга байкоочулук кылган өлкөлөрдүн өкүлдөрү катышты. Жыйындын соңунда Венгриянын премьер-министри Виктор Орбанга түрк дүйнөсүнүн Жогорку ордени тапшырылды. Президент Жапаров уюмда Венгрия өзгөчө орунду ээлей турганын белгилеп, Орбандын анын өнүгүшүнө кошкон салымы жогору экенин айтты.
Түрк мамлекеттер уюму 2009-жылы 3-октябрда Азербайжандын Нахичеван шаарында өткөн жыйында Түрк кеңеши деп түзүлгөн. Башында Азербайжан, Түркия, Казакстан жана Кыргызстан түзгөн бул уюмга 2019-жылы Өзбекстан да кошулган. 2021-жылы 12-ноябрда Стамбулда өткөн саммитте Түрк мамлекеттер уюму деп аталган. 2018-жылдан бери Венгрия, 2021-жылдан бери Түркмөнстан уюмга байкоочу катары катышып келет. (КЕ)
Дагы караңыз
Жапаров: Кыргызстан палестин-израил жаңжалын тынчтык жол менен чечүүнү колдойт Футбол: “Абдыш-Ата” үчүнчү ирет Кыргызстандын чемпиону болдуБишкекте окуучунун апасынан тил уккан мугалим жумуштан кеттиЭрдоган түрк тилдүү мамлекеттерге орток алфавитке өтүү сунушун берди