Немис коопсуздук органдары 19-декабрдын кечинде Берлиндеги калабаны уюштурган деп теги боюнча тунистик, 24 жаштагы Анис Амрини аныкташты. Кандуу окуя Иса пайгамбардын туулган күнүн майрамдоо алдында уюштурулган базарлардын биринде өткөн. Базарга келгендерди оор жүк ташыган автоунаа тебелеп кеткен. Кол салуунун натыйжасында 12 адам набыт болуп, 48и жараат алган.
Эки күн өткөндөн кийин 21-декабрдын кечинде Германиянын Федералдык прокуратурасы интернет сайтында шектүүнүн сүрөттөрүн жарыялап, коомчулукка ал “коркунучтуу жана куралчан” болушу мүмкүн экенин эскертти.
Шектүү террорчу тууралуу кабар Европанын башка мамлекеттерине да берилип, издөөгө Германиянын он алты облусунун полиция күчтөрү тартылууда.
Немис ички иштер министри Томас де Мезьердин 22-декабрда айткандарына караганда, аларда азыр изделип жаткан тунистик жигит кол салуунун уюштуруучусу болушу мүмкүн деген ишеним жогору.
Полициянын эсебинде, кылмышка шектүү жүк тарткан унааны польшалык айдоочудан тартып алган. Ал ок жеп, кийин алган жараатынан улам каза тапкан. Автоунаанын кабинасынан изделип жаткан тунистиктин иммиграциялык кагаздары, бармак изи табылган.
Германиянын ал жашаган Түндүк Рейн-Вестфалья жеринин ички иштер министри Ральф Йегердин айтымында, издөө салынган шектүүнүн качкын макамын алуу арызы быйыл августта четке кагылган, мындан улам ал мекени Туниске кайтуусу керек эле, бирок ал үчүн тиешелүү документтери болгон эмес.
Аймактык министр кошумчалагандай, ал Германиянын контртеррористтик борборуна да белгилүү болгон, анын маселеси бул кызматтын өкүлдөрү менен өткөн айда эле талкууланган.
19-декабрдын кечиндеги окуядан соң полиция адегенде пакистандык 23 жаштагы мигрант жигитти кармаган.
Бирок анын кол салууга катышканы боюна эч бир далил табылбаганына байланыштуу кайра бошоткон эле.
20-декабрда болсо “Ислам мамлекети” тобу Берлиндеги чабуулга ал шыкак бергенин жана анын “жоокери” жасаганын айтып чыкты. Мындай билдирүү экстремисттик уюмга байланышы бар AMAQ интернет сайтында жарыяланды.
Майрам алдындагы кол салуу бир жагынан Берлиндин тургундарын сестентсе, экинчи жагынан канцлер Меркелдин миграциялык саясатын сындагандардын кыжырын кайнатты.
Андан бери шаарда азыркы өкмөттүн качкындарга карата мамилесин колдогондордун, каршылардын да акциялары өттү.
2015-жылы өлкөсүнө 900 миңдей качкынды киргизүү менен саясий беделин тобокелге салган Ангела Меркел Берлиндеги кол салуудан кийин төмөнкү жагдайга көңүл бурган эле:
- Мен билип турам, эгер бул кылмышты Германиядан коргоону жана качкын макамын издеген адам жасаганы ырасталса, муну көтөрүү баарыбыз үчүн кыйын болот. Бул Германияда качкындарга күнүнө жардам берип иштеп жаткан немистерге, ошондой эле биздин жардамга чындап эле муктаждарга жана биздин өлкөгө интеграцияланууга аракеттенип жаткандарга оор тиет.
Ангела Меркел үчүн келерки 2017-жылы шайлоо жылы. Ал Христиан-демократиялык союзу партиясынын лидери катары канцлердин төртүнчү мөөнөтүнө барышы үчүн саясий жарышка кайрадан түшөрүн өткөн айда жарыялаган.
