Москва, Украинанын элчилигинин алдына гүл койгону келген адамдар.
Орусиянын президенти Владимир Путиндин басма сөз катчысы Дмитрий Песков Украинанын бийлиги жаңжалды жөнгө салуу үчүн сүйлөшүүдөн баш тартканын билдирди. Бул тууралуу Орусиялык “Эхо Москвы” басылмасына таянуу менен “Азаттыктын” орус кызматы жазды.
Песков сүйлөшүү болбогондуктан Москва Украинанын аймагында аскердик операциясын улантып жатканын маалымдады.
Расмий Киев Кремлдин бул билдирүүсүнө комментарий бере элек.
Украинанын президенти Владимир Зеленский 25-февралдагы видеокайрылуусунда Орусиянын өз өлкөсүнө басып киришин “Европага карата согуш” деп атап, Владимир Путин менен сүйлөшүү баштоону сунуштаган. Путин диалогду Беларустун борбору Минск шаарында уюштурууну демилгелеген. Киев болсо сүйлөшүүнү Венгрияда же Израилде өткөрүүнү талап кылган.
26-февралда Зеленскийдин басма сөз катчысы Сергей Никифоров журналисттерге Орусия менен ыктымал сүйлөшүүлөр деле кеңешилип жатканын билдирди. Айрым маалыматтар боюнча украин тарапты орус бийлиги койгон талаптар канааттандырган эмес.
Орусиянын Украинага кол салуусуна байланыштуу 26-февралда Литва орусиялык авиакомпаниялар үчүн асманын жапты. Мунун алдында Эстония менен Латвия да орус учактарынын учуусуна чектөө киргизген.
Ага чейин Британия, Чехия, Польша, Румыния жана Болгария да Орусиянын учактарынын учуусуна тыюу салган.
“Росавиация” аба транспортунун федералдык агенттиги да аталган өлкөлөргө жооп чара катары алардын учактарына Орусиянын үстүнөн учууга бөгөт койду.
Киев үчүн салгылаш уланып жатат. Украинанын өкмөтү Кызыл чырым уюмуна кайрылып миңдеген орус аскерлеринин сөөктөрүн мекенине жеткирип берүүнү суранды. Орусия каза болгон аскерлери тууралуу эч кандай маалымат бере элек. Кошуна мамлекеттерге он миңдеген украиналыктар качууга аргасыз болушту.
