Орусиянын аскерлерин Донбасстын аймагына киргизүү чечиминин фонунда Украинанын президенти Владимир Зеленский куралдуу күчтөрдүн резервдеги жоокерлерин чакыруу тууралуу жарлыкка кол койду.
“Бизге украин армиясын жана башка аскердик түзүмдөрдү ыкчам түрдө толуктообуз зарыл болуп турат. Башкы командачы катары мен резервдеги жоокерлерди кайсы бир мөөнөткө чакырттым. Кеп ыкчам резервде турган жарандар жөнүндө гана болуп жатканын белгилеп коёюн”,-деп келтирилет Зеленскийдин сөзү президенттин сайтында.
Ал азырынча жалпы элдик мобилизация кылууга зарылчылык жоктугун маалымдады. Буга чейин катардагы украин жарандары, анын ичинде аялдар да аскердик машыгуудан өтүп жатканы айтылган.
Владимир Зеленский мурдараак Украина дагы деле кырдаалды тынчтык жолу менен жөнгө салууну жактай турганын айткан, ал ошол эле маалда өлкө агрессияга да даяр экенин билдирген. Бул тушта орус президенти Владимир Путин Украина менен конфликтти биротоло чечүү үчүн Батыш өлкөлөрү жана Киев Крымды “Орусиянын бир бөлүгү” катары таанышы керектигин жарыялаган.
21-февралда Путин Украинанын чыгышындагы жикчилдердин “Донецк Элдик Республикасы” жана “Луганск Элдик Республикасы” түзүлүштөрүн көз карандысыз мамлекет катары тааный турганын жарыялаган. Алардын лидерлери менен кызматташуу келишимине кол койгон. Бул чечимди Мамдума 22-февралда ратификациялады, ошол эле күнү Федералдык кеңеш орус аскерлерин Донбасста колдонууга уруксат берди.
БУУнун баш катчысы: орус аскерлери Донбасста тынчтык орнотпойт
Бириккен Улуттар Уюмунун баш катчысы Антониу Гутерриш өзүн “Донецк Элдик Республикасы” жана “Луганск Элдик Республикасы” деп атап алган аймактардагы жагдай геноцид деген аныктамага туура келбей турганын билдирди. Ошол себептүү БУУ Донбасстын аймагына кирген орусиялык аскерлерди тынчтык орнотуучу күчтөр катары санабай турганын маалымдады.
БУУнун сайтына жарыяланган Гутерриштин билдирүүсүндө Орусия Федерациясынын жикчил “республикалардын” көз карандысыздыгын таануу аракети Украинанын аймактык бүтүндүгүн жана суверенитетин бузары, Улуттар Уюмунун жобосуна каршы келери белгиленет.
“Бир өлкөнүн аскерлери экинчи өлкөнүн уруксаты жок анын аймагына киргени, алар бейтарап бейпилдик орнотуучулар болуп эсептелбейт”,- дейт анда баш катчы.
Орусиянын президенти Владимир Путин мурдараак атайын телекайрылуусунда 2014-жылы Украинада болгон төңкөрүштөн кийин “Донбасстагы орус тилдүү миллиондой адам геноцидге кабылып жатканын” айткан. Ал жикчилдерди таанууну ушуну менен байланыштырып, аларды коргоо зарылдыгы менен түшүндүргөн.
21-февралда Путин Украинанын чыгышындагы жикчилдердин “Донецк Элдик Республикасы” жана “Луганск Элдик Республикасы” түзүлүштөрүн көз карандысыз мамлекет катары тааный турганын жарыялаган. Алардын лидерлери менен кызматташуу келишимине кол койгон. Чечимди Мамдума 22-февралда ратификациялады, ошол эле күнү Федералдык кеңеш орус аскерлерин Донбасста колдонууга уруксат берди.
23-февралда Европа Биримдиги Орусиянын өздөрүн “Донецк Элдик Республикасы” жана “Луганск Элдик Республикасы” деп жарыялап алган аймактардын “көз карандысыздыгын” таануусуна жооп катары санкциялар пакетин кабыл алды.
Биримдиктин катчылыгынын сайтында жазылгандай, санкцияга аталган аймактарды таануу тууралуу президент Владимир Путиндин кайрылуусуна добуш берген Орусиянын Мамлекеттик думасынын 351 депутатына жана жогорку даражалуу 27 аткаминер илинди. Алардын ичинде өкмөт мүчөлөрү, аскердик кызматкерлер, бизнесмендер жана башкалар бар.
Санкция алардын Евробиримдикке киришине жана аймак аркылуу өтүүсүнө тыюу салат, уюмга мүчө мамлекеттердеги активдери камакка алынат, банктарда эсеп ача албайт. Мындан сырткары бул чара Украинанын Донецк жана Луганск облустарына товар ташып кирүү жана ташып чыгууга чектөө коёт.
Европа Биримдиги зарыл болсо, уюмдагы өлкөлөр мындан дагы катаал саясий жана экономикалык санкцияларды кабыл алууга даяр экенин кабарлады.
Орусиянын президенти Владимир Путин 24-февралда таң эрте билдирүү жасап, Донбасста атайын аскердик операция баштоо тууралуу чечим кабыл алганын билдирди. Ал украин жоокерлерин куралдарын тапшырып, үйлөрүнө кайтууга чакырды.
"Бириккен Улуттар Уюмунун (БУУ) 51-беренесине ылайык, Федералдык Кеңештин санкциясы менен мен атайын аскердик операция баштоо тууралуу чечим кабыл алдым. Биз Украинаны демилитаризация жана денацификация кылганга аракет кылабыз. Ошондой эле жайкын тургундарга, алардын ичинде Орусиянын жарандарына каршы бир топ кандуу кылмыштарды жасагандарды сот жообуна тартабыз", - деди Путин.