Чаткалдагы кар көчкү алдында калган акыркы үч адамдын да сөөгү табылды
Жалал-Абад облусунун Чаткал районундагы Ак-Сай аймагында болгон кар көчкү окуясында дайынсыз болгон акыркы үч адамдын сөөгү табылды. Өзгөчө кырдаалдар министрлигинин билдирүүсүнө ылайык, бүгүн саат 10:30да куткаруучулар акыркы үч адамдын сөөгүн табышты. Бир күн мурда, 18-октябрда дагы үч адамдын сөөгү табылып, Кумбел тилкесиндеги штабга жеткирилген.
Бүгүн эрте менен саат 07:30да жети кишиден турган куткаруучулардын биринчи тобу жөнөп кеткен. Кийинчерээк, саат 08:34тө Airbus H145 тик учагы кошумча куткаруучуларды жана кар көчкү станциясынын кызматкерлерин алып учуп кеткен. Көп өтпөй дагы кошумча 16 куткаруучу жиберилген.
Трагедиялык окуянын жыйынтыгында алты адамдын сөөгү табылды. Өзгөчө кырдаалдар министрлиги табылган сөөктөрдү ИИМ кызматкерлерине жана туугандарына өткөрүп берүү иштерин жүргүзүп жатканын билдирди.
Бул окуя Кыргызстандын бийик тоолуу аймактарындагы кар көчкү коркунучун дагы бир жолу эске салды. Өзгөчө кырдаалдар министрлиги жарандарды тоолуу аймактарга барганда сак болууга жана коопсуздук эрежелерин сактоого чакырган.
Өзгөчө кырдаалдар министрлиги Чаткалдагы кар көчкү алдында калгандарды издөө иши кайра башталганын кабарлады. Маалыматка караганда, 19-октябрда жети кишиден турган куткаруучулардын биринчи тобу кар көчкү алдында калгандарды издөө үчүн саат 07:30да жөнөп кеткен. Алардын экөө кар көчкү боюнча адистер.
Ошондой эле саат 08:34тө издөө иштерин улантуу үчүн министрликтин Airbus H145 тик учагы куткаруучулар жана кар көчкү станциясынын кызматкерлери менен Кумбел тилкесинен кар көчкү түшкөн жерге учуп кетти.
Чаткал районунун Беш-Терек айылынын башчысы Кубанычбек Орозалиев
сөөгү табылган үчүнчү жаран Жаңы-Базар айылынын тургуну экенин, сөөк айылына жеткирилгенин айтты.
Кырсык болгон жерде Каныш-Кыя айыл аймагынын 13 тургуну жана бир кытай жараны болгону айтылып жатат. Алар 9-октябрда эндик өсүмдүгүнүн тамырын казып алууга чыгып кеткен. Көчкү баскан жерде 12 адам болcо экөө башка коктуда жүргөн. Дал ошол экөөнүн бири Субанов Рустамдын атасы Шаанбек Субанов “Азаттыкка” буларды айтты:
“Көчкүдө калган балдар бөлөк балдар. Тигилер дагы бир кокту ашып кетишкен. Булар көп болгон. 16 ат болгон. Алардын салмагын элестетсең. Булар кабаттап өтүп баратканда көчкү жүргөн. Бирден-бирден өткөндө аман калышат эле”.
Кырсыктан аман калган алты жарандын абалы жакшы экени кабарланды.Алардын бири Жаныбек уулу Марстын апасы уулунун абалы тууралуу мындай деди: “Абалы жакшы эле. Башым деп атат. Уколун алдырып, молдого окутуп маңдайында отурам”.
Саламаттык сактоо министрлигинин Жалал-Абад облусундагы координатору
Махмаджунус уулу Өмүрбек Чаткалда тоодогу каргашадан кийин алты киши дарыгерлерге кайрылганын, алардын үчөө ооруканага жаткырылганын "Азаттыкка" бейшембиде билдирген.
Чаткалда эндик казганы кеткен 14 адамдын дайыны чыкпай жатканы, алар келе жаткан жолдо көчкү жүргөнү 16-октябрда белгилүү болгон. Ошондон бери окуя болгон Ак-Сай ашуусу тарапта аба ырайы жакшы болбой, Өзгөчө кырдаалдар министрлигинин тик учагы 18-октябрда барды. Ал жерге автоунаа бара албайт, ат менен бир күндүк жол экени айтылып жатат.