Өзгөчө кырдаалдар министрлигинин 16-октябрда саат 22:00гө берген маалыматына караганда, эки күн мурда Чаткалдагы Ак-Сай ашуусундагы кар көчкүдөн улам кар алдында калганы айтылып, дайынсыз болуп жаткан алты адам изделүүдө.
Маалыматта 9-октябрда тоого эндик өсүмдүгүнүн тамырын казып алууга кеткен боюнча 14 адам кайра үйлөрүнө кайтып келген эмес. Бул тууралуу Каныш-Кыя айылынын тургуну Курманбек Курманалиев 16-октябрда эртең менен Чаткал районундагы өзгөчө кырдаалдар бөлүмүнө кабарлаган. Ушундан кийин издөө-куткаруу иштери башталып, шаршембиде саат 14:00дө эки адам Коргон-Сай айылына жакын жерден, дагы алты адам Кум-Бел ашуусунан ашкан тараптан аман-эсен табылган. Алар тоодо кар көчкү жүргөнүн айтышкан.
“Табылган жарандардын билдирүүсүндө 2024-жылдын 14-октябрында болжол менен саат 18:00до Ак-Сай ашуусуна жакын коктулардын биринде кар кар көчкү жүрүп, 6 адам жана 17 баш жылкыны басып калганы маалымдалган” деп айтылат Өзгөчө кырдаалдар министрлигинин билдирүүсүндө.
Куткаруу иштерине 5 куткаруучу, 10 жергиликтүү жашоочу жана Жарандык коргонуу кызматтарынан 2 оор инженердик техника жана тез жардам кызматтары тартылган.
Өзгөчө кырдаалдар министрлиги алты жаранды кар астынан чыгаруу иштери эртең уланарын кошумчалады.
Эндик сейрек кездешүүчү жана кызыл китепке кирген өсүмдүк. Айрым аймактарда анын тамырын казып, сатуу менен алектенген учурлар катталган.
Чаткалдын Каныш-Кыя айылынын тургуну "Азаттыкка" буларды билдирди:
"Булар Ак-Сай тараптагы коктулардын биринде жүргөн деп айтылып жатат. Ак-Сайдын Өзбекстан менен чек ара жагына барышкан. Мындай тамыр жакынкы тоолордо калган эмес. Жакынкы тоолор болсо кар жааганда келип калышмак да. Суткалап, 10-15 сааттап жол жүргөн жерлерге барышат. Алыскы тоолорго барып келип жатышканы үчүн ушундай кырсык болду. Бул чөптү көбүнчө Бишкекте кытайлар сатып алышчу. Бирөөлөр медицинада, бирөөлөр косметикада колдонулат дешет. Азыр айылдарда килограммын миң сомдун тегерегинде сатып алып жатышкан. Миң сомдон да жогорураак. Жергиликтүү эл эки-үч жылдан бери ушул чөп менен алектенип, алыскы тоолорго барып казып келчү."
Ушул күндөрү Кыргызстанда аба ырайы кескин бузулуп, жамгыр, тоолуу аймактарга кар жаап жатат. Чаткал өрөөнүнө кар түшкөнү айтылган.
Жалал-Абад облусунун Чаткал районунун Ак-Сай тоосунда кар көчкүдө калган алты адамды издөө иштерине Өзгөчө кырдаал министрлигинен (ӨКМ) 20 куткаруучу тартылды. Бул тууралуу министрликтин басма сөз кызматы билдирди.
Мекеменин маалыматына ылайык, 9-октябрда Каныш-Кыя айылынын 13 тургуну жана Кытайдын бир жараны эндик өсүмдүгүнүн тамырын казып алууга кеткен боюнча кайра үйлөрүнө кайтып келген эмес.
Кийин издөө-куткаруу иштери башталып, 16-октябрда саат 14:00дө эки адам Коргон-Сай айылына жакын жерден, дагы алты адам Кум-Бел ашуусунан ашкан тараптан аман-эсен табылган. Алар Ак-Сай ашуусунда кар көчкү жүрүп алты кишини басып калганын айтышкан.
Эндик сейрек кездешүүчү жана кызыл китепке кирген өсүмдүк. Айрым аймактарда анын тамырын казып, сатуу менен алектенген учурлар болгон.
Ушул күндөрү Кыргызстанда аба ырайы кескин бузулуп, жамгыр, тоолуу аймактарга кар жаап жатат. Чаткал өрөөнүнө кар түшкөнү кабарланган. ӨКМ буга чейин аба ырайы кескин өзгөрүп, нөшөрлүү жаан, тоолуу аймактарда кар жаай турганын эскерткен.
17-октябрда Чаткал районунун акими Алтынбек Сеңирбаев кырдаал боюнча “Азаттыкка” маалымат берип, көчкү коркунучу дагы деле бардыгын, андыктан куткаруучулар үчүн кооптуу болуп жатканын билдирди.
“Ал жакка баруу мүмкүн эмес, көчкү кооптуулугу азыр деле бар. Өзгөчө кырдаал жарыялаганбыз. Ал жакка техника жөнөтүү да кыйын болуп турат, көчкү алып кетиши мүмкүн. ӨКМ менен тик учакты сүйлөшүп жатабыз, ал бүгүн аба ырайына байланыштуу уча албайт. Эртең учуруу боюнча макулдашып жатабыз. Азыр техникаларды чыгарып, коопсуз жайларда жолдорду тазалай берели дедик”, - деди Сеңирбаев.