Олимпида оюндарынын тарыхында буга чейин бир спорт түрүнөн беш алтын медал уткан спортчу чыга элек болчу.
Париж Олимпиадасындагы грек-рим күрөшүнөн 130 килограммга чейинки салмакта финалдык беттеште атактуу Михаин Лопес Чилинин атынан чыккан, теги кубалык Ясмани Акостаны 6:0 эсебинде утту. Калыс Лопестин колун көтөргөндөн кийин, ал бут кийимин чечип килемди үстүнө коюп, спорттук карьерасын жыйынтыктаганын ишарат кылды.
"Мен бактылуумун, бул менин жашоомдогу, карьерамдагы эң бийик жетишкендик болду", - деди Лопес мелдештен соң.
Париждеги бул жеңишин балбан маркум атасына арнаган.
Михаин Лопес өз карьрерасында жалпы алты Олимпиадага катышкан. 2004-жылы Афинада өткөн алгачкы Олимпиадасында чейрек финалда жеңилсе, калган беш Олимпиададан (Бээжин, Лондон, Рио-де-Жанейро, Токио, Париж) беш алтын медал алып, беш жолу чемпион болду.
Ал Олимп оюндарынан уткан ар бир алтын медалын төмөндөгүчө сүрөттөдү: "Бээжин- жаштык. Лондон - эрдик. Рио - аракет. Токио - курмандык. Париж - кубаныч".
Михаин Лопес 2002-жылдан бери грек-рим күрөшүнөн мелдештерге тынымсыз катышып келет. Ал Олимпиададан сырткары беш жолку Дүйнө чемпиону болуп, беш жолу Панамерика оюндарын уткан. Тогуз жолу Панамериканын чемпиону болгонго жетишти. Үч ирет Дүйнө чемпионаттарынын күмүш медалын тагынган.
