Бүгүн (шаршембиде) да Израил аскерлери Газа тилкесине чабуулун улантты. Шейшембиде палестиндик «Хамас» куралчандар тобунун Газа аймагындагы жетекчиси катары Абдел Азиз Рантиси жарыяланды. Араб өлкөлөрү Вашингтондун кеңири Жакынкы Чыгыш аймагындагы тынчтык жараяны боюнча жаңы долбооруна сын пикирлерин билдирүүдө. Адистердин айтымында, соңку окуялар Ак Үйдүн жаңы долбооруна олуттуу өзгөртүү киргизүүсүнө кошумча түрткү болушу мүмкүн.
Бүгүн Тайван президенти Чэн Шуйбян менен анын орун басары Аннет Лү шайлоо өнөктүгүнө арналган жыйынга бараткан маалында аткылоого кабылып, экөө тең жеңил жаракат алышты. Бул окуя түштүктөгү Тайнан шаарында болду. Бирок бийликтер ишембиге белгиленген президенттик шайлоо өз ирээти менен өтө берээрин маалымдашты.
Бүгүн (бейшембиде) грузин президенти Михаил Саакашвили Ажариянын ордо шаары Батумиге келип, расмий Тбилисиге баш ийгиси келбей жаткан автономиянын жетекчилиги менен сүйлөшүү жүргүздү. Тбилиси менен Батуминин өз ара тирешүүсү дароо эле бүтө калчудай көрүнбөйт, бирок бул сапардын жүзөгө ашырылышынын өзү эле тараптардын саясий баарлашуу жолун четке какпагандыгын айгинелөөдө. Саакашвили бул жолку сүйлөшүү байсалдуу аяктаганын билдирди.
Эми космосту иликтөө жаңылыктарына назар салыңыздар. АКШнын космосту иликтөө агенттиги – НАСАнын (NASA) маалыматына караганда, «Оппортюрити» марсжүргүсү Кызыл планетанын кыртышында бир кезде жашоонун өтө жөнөкөй түрүнүн келип чыгышы үчүн жетиштүү көлөмдө суу болгонун тастыктай алчу далил чогултту. Деги, Марста жашоо болгонбу?
Бүгүн Кыргызстандын тышкы иштер министри Аскар Айтматов “Эркин Европа – Азаттык” үналгысынын Вашингтондогу кеңсесине келип, журналисттер менен маекке катышты. АКШда иш сапар менен жүргөн кыргыз тышкы иштер министри Ооганстандан тымызын ташылып жаткан баңгизаттар жана аймакта тымызын иш-аракетин күчөткөн исламчыл фундаменталисттер жалпы Борбор Азиянын коопсуздугу үчүн олуттуу коркунуч туудуруп жатканын айтты.
Бүгүн Орусиянын президенти Владимир Путин премьер-министр Михаил Касяновдун өкмөтүн кызматтан кетирди. Бул кадамды ал орус өкмөтүнүн начар иштеп келгендигинен улам эмес, 14-марттагы президенттик шайлоодон кийинки болочокку саясатка байланыштырып жасаганын айтты. Айрым серепчилер Путин өзүнүн жеңээринен шектенбестигин жана бул кадам аркылуу өзүнүн болочокку мураскору катары буга чейинки премьерди санабагандыгын айгинелетти деп баалашууда.
Эми “дин жана коомдук турмуш” аттуу апталык берүүнүн кезектеги чыгарылышына назар салыңыздар. Деги, динди мыйзам аркылуу бекемдөө же секулярдык түзүлүштү мыйзамдын күчү менен коргоо алгылыктуубу? Мусулман өлкөлөрүндө эле эмес, Батыш коомунда да бул суроого карата бир беткей жооп табуу кыйын.
Бүгүн таңга маал Ирандын Нишапур шаарына жакын Хайям деген темир жол бекетинде цистерналар жарылып, анын айынан бери дегенде 182 киши өмүрүнөн айрылды жана 350дөй киши жаракат алды. Бул окуя унаа жана өндүрүш коопсуздугу маселесине бүткүл дүйнө жүзү боюнча олуттуу маани берүү зарылдыгын көрсөтүүдө.
Пакистандын президенти Первез Мушарраф өзөктүк куралдарды таркатпоо тууралуу келишимдин одоно бузулушу менен байланыштуу чуулгандуу окуяга кабылды. Пакистандык төрт атуул өзөктүк технология маалыматын башка бир өлкөгө тымызын өткөргөн деп айыпталууда. Алардын арасында “исламдык өзөктүк бомбанын атасы” катары таанымал Абдул Кадыр Хан да бар.
Кечээки (жекшембидеги) Мина өрөөнүндө “шайтанды таш бараңга алуу” жөрөлгөсү маалындагы тыгылыштын айынан өмүрүнөн ажырагандардын саны 250дөн ашты. Кыргызстандык зыяратчылардын баары аман-эсен. Деги, алардын зыяратчылардын коопсуздугу боюнча чаралар кандай деңгээлде уюштурулуп жатат? Ажыга баруу коркунучтуу эмеспи?
Бириккен Улуттардын Башкатчысы Кофи Аннан бейшембиде Европалык парламенттин Андрей Сахаров атындагы сыйлыгын алды. Сыйлык БУУнун кызматкерлеринин адам укуктарын коргоо, өзөккү эркиндикти камсыз кылуу, зулумдукка каршы күрөш жаатында кошкон салымдарына берилген жогорку баа болуп калды. Ал эми Кофи Аннан европалыктарды башка аймактарда байырлаган жана келгин замандаштарына кайрымдуу болууга чакырды.
Европа Кеңешинин Парламенттик жыйыны (ассамблеясы) 27-январда Азербайжандагы саясий камактагылар маселесин талкуулап, расмий Бакуну сынга алды. Илхам Алиевдин өкмөтү болсо Батыштын сынын четке кагууда.
Бүгүн британ сотунун мүчөсү, лорд Брайан Хаттон курал-жарактар боюнча адис Дэвид Келлинин өлүмү менен байланыштуу соттук териштирүүнүн жыйынтыгын жарыялады. Хаттондун пикиринде, Би-Би-Синин “Ирактагы массалык кыргын куралынын коркунучу тууралуу көбүртүп-жабыртып айткан” деп британ өкмөтүн сынга алышы жүйөөсүз болчу. Бирок бардык эле британдыктар Хаттондун тобунун тыянагы менен макул деп айтуу кыйын.
Январдын 22синде Прагада айтылуу “Фебио фест” кинофестивалы салтанаттуу түрдө ачылды. Он биринчи жолу өткөрүлүп жаткан бул маданий иш-чарага дүйнөнүн чар тарабында жайгашкан өлкөлөрдүн кинотасмалары тартылган. Орусия менен Казакстандын кино өнөрчүлөрүнүн эмгектери да фестивалда жандуу талкуу жаратууда.
Ирандын вице-президенти Мохаммад Али Абтахи келээрки айдын 20сына белгиленген шайлоонун ирегесинде жүздөгөн депутаттыкка талапкерлердин шайлоодон четтетилишине байланыштуу өкмөттүн бир канча мүчөсү кызматтан кетүү тууралуу арыздарын президенттин кеңсесине тапшырганын билдирди. Айрымдары бул кадамды эскичил нукту туткан Көзөмөл кеңешине карата кысым көрсөтүүнүн жаңы далаалаты катары баалашууда.
Бүгүн Жапония Иракка жайгаштыра турган алты жүз жоокеринин алгачкы тобун өлкөнүн түштүгүндөгү Самава шаарына жиберди. Бул топ Экинчи дүйнөлүк согуштан кийинки мезгилде Жапония чет өлкөгө аттандырган алгачкы аскер тобу болуп калды.
Тажикстан Исламдык кайра жаралуу партиясы шаршемби күнү кечинде билдирүү жарыялап, Жогорку соттун дүйшөмбү күнкү өкүмүн сынга алды. Жогорку сот аталган исламчыл партиянын төрт мүчөсүн ар кыл мөөнөткө абакка кескен болчу.
Кечээ, январдын 13үндө, Ташкен шаарынын жанында бир жүргүнчү учак кыйроого учурап, андагы 37 киши бүт набыт болду. Өмүрүнөн айрылган жүргүнчүлөрдүн арасында чет өлкөлүктөр да бар. Алардын бири – БУУнун Өзбекстандагы өкүлү Ричард Конрой экени тастыкталды. Расмий бийликтер “Өзбекстан аба жолдоруна” таандык Як-Кырк учагынын кыйрашынын себептерин иликтей баштады.
Эртең АКШ президенти Жорж Буш космосту иликтөө тармагындагы жаңы демилгени жарыя кылмакчы. Атап айтсак, америкалыктар Айда туруктуу космостук бекет куруу долбоорун баштоого ынтызар. Бул бекет курулуп калса, анда ал алыскы болочокто Марсты көздөй аттанган кемелер өргүй турган жай болот. Ал эми президент Бушка каршы саясатчылар бул демилгенин артында быйыл күзүндө өтө турган президенттик шайлоо өнөктүгүнө камылганын дагы бир айла-амалы турат дешүүдө.
HTTP://WWW.RFERL.ORG/NCA/IMAGES/PEOPLE/SAAKASHVILI.JPG Грузияда алдын-ала жарыяланган жыйынтык көрсөткөндөй, жекшембидеги президенттик эрте шайлоодо Михаил Саакашвили олуттуу жеңишке жетишти. Буга чейин эле көз каранды эмес байкоочулар Саакашвили мырзанын жеңээрин божомолдоп жатышкан. Ошентип, өкмөттүн өкүм бийлигинин аркасында атасынан баласына “тактыны мурастаткан” азери вариантынан айырмаланып, грузин варианты Кавказда демократиялык жол менен президентти шайлоого болоорун айгинеледи.
Дагы жүктөңүз
