"Азаттыктын" веб-редактору, журналист. 2004-жылы Кыргыз-Түрк "Манас" университетинин журналистика факультетин аяктаган.
Бүгүн (25-июнда) Түркмөнстандын тышкы иштер министри Рашид Мередовдун АКШга төрт күндүк сапары башталды. Сапарынын алгачкы күнүндө Рашид Мередов Ак үйдүн жогорку даражалуу өкүлдөрү менен жолугушту. Алдыдагы күндөрү Түркмөнстандын тышкы иштер министри өз өлкөсүнө инвестиция тартуу максатында америкалык ExxonMobil жана Chevron өңдүү ири мунай компаниялардын өкүлдөрү менен жолугушары күтүлүүдө.
Өткөн жылы августта дүйнө коомчулугу Грузияда орун алган окуяларды көз жаздымда калтырбай, абдан кунт коюп байкоо салган. Бирок бул жылы анчалык көңүл бурулбаса да, Грузияда андан да жаман кризистик кырдаал түзүлүп калышы ажеп эмес. Грузин оппозициясынын лидерлеринин бири Нино Буржанадзе “Азаттык” үналгысына жазган серебинде “демократия деген сөзгө жамынып, авторитардык бийликти орноткон бир гана адамдын аракеттеринен улам Грузия демократиялык дүйнөнүн картасынан жоголуп кетиши мүмкүн” деп айтат.
21-майда Алексей Шумм аттуу Москва шаарынын тургуну интернеттеги блогу аркылуу өз кайгысы менен бөлүшкөн. 13-майда жолду кесип өтүп бараткан кош бойлуу жубайын сүзгөн айдоочу окуя болгон жерден качып кетип, Алексейдин жубайы ошол жерден көз жумган экен. Бул окуя интернетте кызуу талкуу жаратып, “Азаттык” үналгысынын Орус кызматынын серепчиси Ольга Серебряная да комментарий жазды.
Өткөн чак учурга уңгулаш болуп турган кезде эч качан өткөн чак болуп калбайт. Ушундан улам Орусиянын президенти Дмитрий Медведев “тарыхый окуяларды жана фактыларды өлкөнүн эл аралык аброюна шек келтиргидей бурмалоодон коргоо боюнча” комиссия түздү. Мындай чечим Орусиянын өзүндө да, Батышын алдыңкы басма сөз каражаттарында да бир катар талкууларды жаратты. Ушул теманын айланасында Russia Today сыналгысынын саясий серепчиси Питер Лэвелл “Азаттык” үналгысына комментарий жазды.
Сват өрөөнүндөгү Мингора шаарында Пакистандын Куралдуу күчтөрү менен талиптер ортосунда уруштар жүрүүдө. Маалыматтарга караганда, өкмөттүк жоокерлер бир нече маанилүү райондорду өз көзөмөлүнө алды.
Ирандын президенти Махмуд Ахмадинежад шайлоо өнөктүгүн Батыш менен Израилди жана өз өлкөсүндөгү реформачыл саясатчыларды сынга алган сөздөрдү айтуу менен баштады.
Казакстандын президенти Нурсултан Назарбаевдин мурдагы күйөө баласы Рахат Алиевдин “Кесеп кайын ата” (“Крестный тесть”) аттуу китеби көптөн бери созулуп келаткан үй-бүлөлүк жаңжалдын отуна май тамызгандай болду.
Өткөн жылы эл аралык коомчулуктун кескин нааразылыгынан улам, өзбек бийлиги пахта өндүрүшүндө балдар эмгегин колдонууга тыюу салган. Бирок укук коргоочулардын айтымында, балдар эмгеги мурдагыдай эле колдонулуп келүүдө.
18-майда Вашингтондо АКШ президенти Барак Обама Израилдин премьер-министри Беньямин Нетаньяху менен жолугушту. Сүйлөшүүдө Жакынкы Чыгыштагы тынчтык жараяны жана Ирандын өзөктүк программасы өңдүү орчундуу маселелер талкууланды. Бирок жолугушуудан кийин Израил менен АКШ айрым маселелерге эки башка караганы маалым болду.
6-майда “Нью-Йорк Таймс” гезити “мурдагы үч дипломат Грузиядагы жаңы согуштун алдын-алуу” өтүнүчү менен АКШга кайрылышканын жазып чыкты.
Мьянманын баш калаасы Рангунда демократиялык оппозициянын лидери Аун Сан Су Чинин үстүнөн сот башталды. 19 жылдан бери үй камагында отурган саясатчы айымдын үйүнө АКШнын жараны жашыруун келип, 2 күн жашаганы маалым болгондон кийин түрмөгө отургузулган. Укук коргоочулар жана Батыш өлкөлөрү Мьянманын бийлигин Нобелдин Тынчтык сыйлыгынын лауреаты Су Чи айым жалган айыпталды деп сынга алууда.
Жыл сайын өткөрүлүп келаткан “Евровидение” сынагынын финалы 16-майда Москвада өтөт. 1956-жылдан бери өткөрүлүп келе жаткан бул сынакта Орусия өткөн жылы алгачкы ирээт биринчи орунду ээлеген. “Евровидение-2009” сынагы эң талаштуу болот деген пикирлер да аз эмес.
АКШнын президенти Барак Обаманын Түркияга сапары соңуна чыкты. Ушул тапта Түркиянын Стамбул шаарында немис-түрк ишканасында иштеген, 1992-жылдан бери бул өлкөдө жашап келаткан Каныбек Осмонов түрк эли Обаманын сапарын кандай кабыл алганы тууралуу ойлору менен бөлүштү.
“Чоң жыйырманын” лидерлери Лондондо өткөн саммитте дүйнөлүк экономикалык күрөш үчүн 1 триллион доллар бөлүүнү макулдашышты. Бул каражаттын ири бөлүгү экономикалык кризисти башынан өткөрүп жаткан өлкөлөргө жардам берүү үчүн Эл аралык валюта коруна жиберилет.
1-апрелде Ооганстан жана Пакистандын президенттери Түркияда жолугушту. Эки өлкөнүн лидерлери 1500 чакырымга жеткен бирдиктүү чек арадагы согушкерлер менен күрөштөгү өз ара кызматташтык тууралуу макулдашышты.
Дүйнө жүзүндө интернетти компьютерлер жана уюлдук телефондор аркылуу колдонгондордун укугу бара-бара чектелүүдө. Бул тууралуу басма сөз эркиндигине көз салган "Фридом Хаус" (Freedom House) уюмунун жаңы чыккан баяндамасында айтылат.
30-мартта Астанада ар апта сайын чыкчу “Мыйзам жана акыйкаттык” гезитинин журналисти Оралгайша Омаршанованын дайынсыз жоголгонуна 2 жыл толду. Омаршанова айым Казакстандын түштүгүндөгү Маловодное жана Казатком кыштактарында чечендер менен казактардын кагылышуусу тууралуу макала жазгандан эки апта өтпөй жоголгон. Бул датага байланыштуу “Эркин Европа/Азаттык” үналгысынын Жаңылыктар бөлүмүнүн улук редактору Мерхат Шарипжан сереп даярдаган.
27-мартта Жер планетасындагы жашы эң улуу чоң энелердин бири саналган карагандалык Сахан Досова туура 130 жашка чыкты. Жергиликтүү аткаминерлер Сахан апага белекке 10 миң тенге берип, андан тышкары карылар үйүнөн бир бөлмө сунуш кылышты.
2-апрелде Лондондо Чоң жыйырмалыктын саммити өтөт. Саммиттин алдында дүйнөлүк лидерлер кечээ Чилиде жолугушту. Ушул эле күнү Европанын көпчүлүк өлкөлөрүндө он миңдеген кишилер экономикалык кризиске нааразылыгын билдиришип, көчөлөргө чыгышты.
1995-жылы “Эркин Европа/Азаттык” үналгысынын ордо шаар Прагада жайгашып калышында өзөктүү ролду ойногон Чехиянын мурдагы президенти, белгилүү диссидент Вацлав Гавел 27-мартта үналгынын баш кеңсесинин жаңы имаратында болду. Гавел жаңы имаратта өткөн редакторлордун алгачкы жыйынын ачып, андан соң кабарчыбыз Жереми Бранстенге маек курду.
Дагы жүктөңүз
