«Кыргызстандын кең келечеги үчүн!» бириккен фронту өзүнүн милдетин өтөп бүттү. Ушинтип билдирген «Ар-Намыс» саясий партиясынын лидери, экс-премьер-министр Феликс Кулов муну Конституциянын жаңы редакциясынын референдумга чыгарылышы менен негиздеди. Апрель митингдери президент Курманбек Бакиевди саясий кырдаалды турукташтыруу үчүн конституциялык реформага барууга аргасыз кылды деп билдирди. Кулов президентти ошондой эле абсолюттук бийликке жетүүгө умтулуп жатат деп сындады.
Кыргызстандын коопсуздук комитети экс-президенттин кызы Бермет Акаевага каршы козголгон кылмыш ишин токтотту. Мурдараак «Кыргызстандын кең келечеги үчүн!» Бириккен фронттун лидерлеринин бири Өмүрбек Субаналиевге каршы козголгон иш да токтотулган болчу. Саясий чөйрөдө мындай кадамдар эки баш мыйзамдын жокко чыгарылышы сыяктуу эле саясий оюндардын туундусу катары саналууда.
30-сентябрда №69-Балыкчы шайлоо округунда Жогорку Кеңешке депутаттыкка кайра шайлоо өтөт. Учурда ага катышууну каалаган жарандардын ичинен үчөө талапкер катары катталышты. Катталгандардын катарында 19-апрелде массалык баш аламандыкты уюштурду деген айып тагылып, иши Коопсуздук Комитетинде турган оппозициянын өкүлү Өмүрбек Субаналиев бар.
Бүгүн кечке жуук Кербенде аксылык жабырлануучулар менен баш прокурор Элмурза Сатыбалдиев жолугушуп, Аксы окуясы боюнча иш кыйшаюсуз тергелерин убада кылды. Ал эми парламенттик комиссия сентябрдын алгачкы он күндүгүнүн ичинде Жогорку Кеңештин сессиясына маалымат берери күтүлүүдө. Саясатчылар болсо Аксы окуясына байланышкан акыркы тергөө деле калыстыкка жеткиреринен күмөн санап жатышат.
Оппозиция күздө өз ишмердигин жандандырып, кайрадан массалык акцияларды уюштурууга барышы мүмкүн. Ушинтип болжогон байкоочулардын кыйласы ага бийлик тарабынан кетирилип жаткан катачылыктар жетиштүү шылтоо болуп берет деп жатышат.
Бишкек шаардык соту «Жашылдар» саясий партиясынын лидери, экс-депутат Эркин Бөлөкбаевге райондук сот чектеген административдик жаза мөөнөтүн азайтты. Анын негизинде саясатчы сот залынан бошотулду. Мындай тыянакты натура деп эсептеген саясатчы эми Жогорку Сотко кайрылмай болду.
Бүгүн Бишкекте Шанхай кызматташтык уюмунун 7- саммити өттү. Алты мүчө мамлекет башчыларынын, байкоочу жана конок катары чакырылган төрт мамлекеттин президентинин жана эки мамлекеттин министр деңгээлиндеги өкүлүнүн катышуусунда өткөн бул саммит он документ кабыл алды. Бишкек саммитинде мурда болжолдонгондой уюмдун курамын кеңейтүү маселеси көтөрүлгөн жок.
Азыркы тапта Бишкекте Шанхай кызматташтык уюмунун 7-саммити башталды. Саммитке мүчө алты мамлекет башчысынан тышкары ардактуу конок жана байкоочу катары дагы төрт президент, эки мамлекеттин министрлери катышууда. ШКУнун саммитинин кадыры өсүп баратат деген айрым байкоочулар, анын келечегин НАТОго атаандаштык менен байланыштырышууда.
19-апрель окуясына байланыштуу камакка алынышкан жарандар Эркин Акназаров менен Жолдошбек Абдиевдин соту 23-августта уланмай болду. Бүгүн болгон кезектеги сот отуруму күбөлөрдүн бирөөнүн көрсөтмөсүн угуу менен чектелди. Айыпталуучулардын тарапкерлери сот создугуп жатат деп, муну күбөгө тартылат деп көрсөтүлгөн милиция кызматкерлеринин сотко келбей жаткандыгы менен түшүндүрүштү.
Диний экстремизмге каршы мамлекеттик чукул чаралардан диний ишенимдеги жай адамдар жабыркап жатышат. Шанхай кызматташтык уюмунун алдындагы күч бийликтеринин аракеттерине байкоо жүргүзгөн укук коргоочулар ушундай билдирүүлөрдү жасашууда. Ошол эле учурда тартип коргоо кызматтары саммиттин алдында коопсуздук чараларын күчөтүп, шектүү саналган жагдайларга чара көрүүдө.
«Бириккен фронттун» башчысы Феликс Кулов массалык баш аламандыкты уюштурду деген айыптын тагылып жатышын саясий буюртма катары баалап жатат. Мындай пикирин саясатчы бүгүн уюштурган маалымат жыйынында билдирди. Анын баамында, бийлик Орусия менен конфедерация түзүү демилгесине тоскоолдук кылуу үчүн ушул ишти жасап жатат. Эки күн мурун Коопсуздук комитети 19-апрелде баш аламандык уюштурулду деген факт боюнча козголгон кылмыш ишинин чегинде, Феликс Куловго Кылмыш Кодексинин 233-беренесинин биринчи пункту боюнча айып таккан.
«Келечеги кең Кыргызстан үчүн» бириккен фронттун лидери, экс-премьер-министр Феликс Кулов бүгүн маалымат жыйынын уюштураары күтүлүүдө. Буга Кылмыш кодексинин 233-беренесинин биринчи пункту боюнча Куловго айып тагылышы себеп болду. Тагылган айып далилденген шартта оппозициянын лидери сегиз жылдан он жылга чейин эркинен ажыратылышы мүмкүн.
Өтүп бараткан аптада Жогорку Кеңештин төрагасы Марат Султанов парламенттин үчүнчү сессиясынын тыянагын чыгарып, парламенттин иши жемиштүү болду деп билдирди. Ошол эле учурда парламентти ашкере саясатчыл болуп кеткендиги үчүн сынга алгандар да болууда.
Жогорку Кеңеш июнь айында кабыл алган Камбарата ГЭСтерин мамлекеттик башкаруудан чыгаруу жөнүндөгү мыйзамы учурда президенттин кароосунда турат. Жогорку Кеңештин «Ак шумкар» фракциясы бул мыйзам добуштарды бурмалоо жолу менен кабыл алынды деп маселе коюп, президентти ага кол койбоого чакырууда.
Кыргызстан менен Өзбекстандын чегаралаш жайгашкан Ош, Баткен, Жалалабад облустары менен Фергана, Наманган жана Анжиян облустарынын жетекчилери 7-июлда жолугушканы турушат. Бул жолугушууда чегарага байланышкан кыйла маселелер талкууланат.
Кыргызстандагы «Аэронавигация» кызматы АКШ баштаган антитеррордук коалицияга мындан ары кызмат кылууну каалабай жатат. Мекеменин кесиптик кошууну АКШнын Кыргызстандагы элчилигине ушундай мазмунда кат жолдоду. Катта кесиптик кошуун нааразылыгын көрсөтүлгөн кызматы үчүн ишкана акы ала албай жатканы менен негиздеди. АКШ элчилиги болсо бул арызды кароого үлгүрө электигин билдирди.
«Жерүй» алтын кенине байланышкан маселе бүгүн парламентте каралбай калды. Буга сессияда кворумдун жоктугу себеп болду. Бул аралыкта Эл аралык арбитраждык сот Кыргызстандан жана Жерүйдөгү алтынды иштетүү милдетин алган мурдагы ишканадан ар кандай билдирүүлөрдү чектей турууну суранды. Учурда кызматташуудан четтетилген «Оксус голд» компаниясы Кыргызстанга 300 миллион доллар доо коюп жатат.
Бүгүн Бишкекте Шанхай кызматташтык уюмуна кирген мамлекеттердин коргоо министрлеринин жыйыны өткөнү жатат. Жыйынга катышуу үчүн кечээ Кыргызстанга Орусиянын, Кытайдын, Казакстандын, Тажикстандын коргоо министрлери жана Өзбекстандын коргоо министринин орун басары келишти.
Жогорку Кеңештин депутаты Акматбек Келдибеков «Агым» гезитин «Камбарата сатылды» аттуу макаласы үчүн сотко берип, 20 миллион сом өндүрөөрүн жарыя кылды. Ал эми райондор аралык сот бүгүн аксылык тургундардын «Агымга» каршы доо арызын кароого киришти. Укук коргоочулардын маалыматтарына караганда, акыркы эки жылда «Агымга» каршы отуздан ашык доо арыз берилди.
Тыңчылык кылды деген шек менен 19-июнда камакка алынган Жогорку Кеңештин кызматкери Жыпаргүл Арыкованын ишин Коопсуздук кызматы жабык иликтөөдө. Ошол эле учурда Шанхай кызматташтык уюмунун Бишкек саммитинин алдында болгон бул окуя коомдук-саясий чөйрөдө түрдүү суроолорду, божомолдорду жаратууда.
Дагы жүктөңүз
