Ош облусундагы Ноокат районунун Көк-Жар аймактык милиция бөлүмүнүн мурдагы башчысы Тимур Абдисатар уулу 2025-жылдын 20-январына чейин Бишкектеги №1 тергөө абагына камакка алынды.
Мындай токтомду Бишкектин Биринчи май райондук соту 27-ноябрда чыгарганын райондук соттун басма сөз кызматы кабарлады. Мурдагы милиция кызматкерин камакка алуу өтүнүчүн сотко Ички иштер министрлигинин (ИИМ) Тергөө кызматынын өзгөчө маанилүү иштерди тергөө боюнча тергөөчүсү берген. Ага Кылмыш-жаза кодексинин “Пара алуу” беренеси менен айып коюлууда.
Ички иштер министрлиги (ИИМ) Тимур Абдисатар уулуна издөө жарыяланганын 25-ноябрда билдирген. Ал 26-ноябрда ИИМге өзү барып, тергөөдөн качпаганын, издөөгө алынганын билбей жүргөнүн айткан. Ошол эле күнү кечинде Фейсбуктагы баракчасына кармалгандан кийин кыйноого кабылганы тууралуу билдирүү жарыялаган. ИИМ ал боюнча комментарий бере элек.
20-ноябрда социалдык тармактарда Тимур Абдисатар уулунун иш бөлмөсүндө тартылган делген видео тараган. Анда жарандык кийимчен Тимур Абдисатар уулуна окшош адамга милициянын формасын кийген адамдар акча берип жатканын көрүүгө болот.
Бул тасмага байланыштуу Ноокат районунун ички иштер бөлүмүнүн беш кызматкери (М. у Ш., Н.З., М.А., М. у Б., Х. у Т.) жана Көк-Жар айылдык милиция бөлүмүнүн нөөмөтчүсүнүн жардамчысы (М.Н) кармалып, 20-январга чейин камакка алынды. Милиция кызматкерлерине Кылмыш-жаза кодексинин “Пара алуу” беренеси менен айып тагылууда.
Шектүүлөрдүн жакындары менен адвокаттары комментарий бере элек.
Сөз болуп жаткан видео Көк-Жар аймактык милиция бөлүмүнүн ошол кездеги башчысы Тимур Абдисатар уулу жана Ноокат районунун Көк-Жар аймактык милиция бөлүмүнүн 10дон ашык кызматкери өлкө бийлигине кайрылуу жолдоп, райондук милициянын ошол учурдагы жетекчиси Талгат Өскөналиевге каршы даттанышкандан кийин чыккан.
Кийин Тимур Абдисатар уулу ички иштер органдарынан кызматтан бошотулуп, Талгат Өскөналиев кызматынан төмөндөтүү менен жумуштан алынган. (BTo)
Дагы караңыз
Депутат “Яндекс.Таксинин” ишмердигин текшерүү керек экенин айттыКыргызстанда орус рублинин сомго карата курсу түшүп кеттиЖК мектепте акча чогулткандарга айып салуу боюнча долбоорду колдодуСадыр Жапаров ЖККУнун саммитине катышуу үчүн Астанага бардыАвстралияда баланы TikTok жана башка платформалардан чектөө сунушу колдоо табуудаОрусияда согушту айыптаганы үчүн соттолгон депутатка жаңы иш козголдуГрузиянын башкаруучу партиясы президенттикке мурдагы футболчуну көрсөтөрүн жарыяладыОрусия германиялык эки кабарчыны өлкөдөн чыгарып жатканын билдирди27-ноябрь: Күйүүчү май жыл башынан бери 3-4 сомго кымбаттады, Австралия балдарга соцмедианы чектөөнү көздөйт