Беларуста бийлик оппозицияны коркутуу, элдин нааразылыкка чыгышына жол бербөө максатында күч кызматкерлеринин атайын машыгуусун уюштуруп жатканын бозгундагы оппозиция лидери Светлана Тихановская билдирди.
19-ноябрда Таллинде санаалаш өлкөлөрдүн өкүлдөрү менен жолугушууда ал беларус бийлигинин мындай аракетин айыптап, 26-январга пландалып жаткан президенттик шайлоодо авторитардык башкаруучу Александр Лукашенко кайрадан, жетинчи жолу жеңүүчү деп жарыяланарына тынчсыздануусун айтты.
"Коопсуздук күчтөрүнүн машыгуулары бурмалоо менен өтө турган шайлоо алдында эркин көз караштагы жарандарды басууга даярдык болуп эсептелет. Жарандарды басмырлоо күчтүүлүктүн белгиси эмес. Бул коркуп жаткандыктын белгиси. Эч кандай коркутуп-үркүтүү беларустардын эркиндикке жана демократияга болгон умтулуусун токтото албайт", — деди Тихановская.
Беларус бийлиги полиция кызматкерлеринин машыгуусу "экстремизмге жана терроризмге жол бербөө", "жарандардын мыйзамсыз иштерге жана ар кандай тартип бузууга барышын алдын алуу" үчүн өткөрүлүп жатканын айтууда.
Ички иштер министрлигинин басма сөз кызматы жарыялаган видеодон атайын беткапчап, кара кийимчен күч кызматкерлери колуна союл, калкан алып, ыктымал митингчилерди таркатууга аракет кылып жаткандай машыгуусун көрүүгө болот.
2020-жылы Беларуста оппозициянын ири нааразылык акциясы Лукашенко кайрадан өзүн президент деп жарыялап алган шайлоодон кийин тутанган. Миңдеген киши митингге чыккан. Акция күч менен таркатылып, көпчүлүгү кармалып, камакка алынган, оппозициянын лидерлери жана айрым өкүлдөрү сыртка чыгып кетүүгө мажбур болгон. Бир нече киши полициянын зомбулугунан каза тапкан. Укук коргоочулар кармалгандар полициянын жана атайын кызматтын кыйноосуна кабылгандыгынын далили бар экенин айтып жүрүшөт. (RK)
Дагы караңыз
Президент Жапаров мектепте окуучунун апасы мугалимди тилдеген окуяны сындадыЖетим-Тоо менен Кызыл-Омполду ким иштетет?Грузия оппозициясы акцияларын токтото турууну чечти Жолго төлөнүүчү акча күйүүчү май аркылуу алынат