Социал-демократтар партиясынын Бишкектеги №1 тергөө абагындагы лидери Темирлан Султанбеков ачкачылык кармоону улантып жатат. Бул тууралуу адвокаты Айбек Турдуев билдирип, 18-ноябрда аны менен жолугуп чыкканын, Темирлан Султанбеков тамак жебей жатканына жетинчи күн болуп баратканын айтты. Анын сөзүнө караганда, ал кармалгандан кийин биринчи үч күн суу да ичкен эмес. Азыр суу ичип баштады.
Жаза аткаруу кызматынын (ЖАК) басма сөз кызматы Темирлан Султанбеков ачкачылык кармоону улантып жатканын ырастап, ал №21 мекеменин медицина кызматкерлеринин көзөмөлүндө экенин кабарлады.
Бишкектин Свердлов райондук соту 15-ноябрда Темирлан Султанбековду, Социал-демократтар партиясынын Бишкектеги шайлоо штабынын башчысы Ирина Карамушкинаны жана партиянын тарапташы Роза Түрксеверди эки айга камакка алган.
Аларга Бишкек шаардык милициясы 14-ноябрда Кылмыш-жаза кодексинин “Шайлоочулардын добуштарын сатып алуу” беренеси боюнча кылмыш ишин козгогон. Шектүүлөр коюлган айыпты четке кагып, муну саясий басым-кысым деп баалап жатат.
Кыйноолорго каршы улуттук борбор Темирлан Султанбеков милициянын убактылуу кармоочу жайында турганда 16 саат токтоосуз суракка алынганын, “бул процессуалдык жактан мыйзамсыз” деп даттанганын билдирген.
Бишкек аймактык шайлоо комиссиясы козголгон кылмыш ишин жана тергөөнүн маалыматтарына таянып Социал-демократтар партиясын Бишкек шаардык кеңешине шайлоого катышуудан четтеткен. (BTo)
Дагы караңыз
18-ноябрь: 10 айда 75 өспүрүм өз жанын кыйды, Сибирде мигранттар бала бакчада иштей албайтАбхазияда оппозиция менен бийликтин сүйлөшүү аракети улануудаCOP29 саммитинде "климаттык фонд" маселеси талкуулануудаОрусия: Сахаров борборунун мурдагы директору сыртынан соттолду ИИМ быйыл 10 айда 75 бала өз жанын кыйганын билдирдиТогуз айда Кыргызстанга сырттан 2 млрд 250 млн доллар которулду