Газа тилкесиндеги качкындар баш калкалаган лагерге 10-сентябрдын таңында жасалган Израилдин армиясынын аба соккусунан кеминде 40 киши набыт болгонун аймактын Жарандык коргоо башкармалыгы билдирди. Жабыркагандардын саны 60тан көп. Анклавды АКШ менен Евробиримдик террордук катары тааныган ХАМАС уюму көзөмөлдөйт. Хан-Юнис шаарынын Масави аймагындагы лагерде аба соккудан кийин адамдарды издөө иштери уланууда.
Израил армиясы башкаруу-көзөмөл пунктундагы хамасчыларды бутага алганын билдирди. ЦАХАЛ тараткан маалыматка караганда, аскерлер карапайым тургундардын арасында жоготууларды болтурбоо үчүн абадан байкоо салуучу каражаттарды, так бутага алчу курал-жабдыктарды колдонгон.
Израил армиясы жайкын тургундардын өлүмү үчүн ХАМАС радикал уюмун күнөөлөп, согушкерлер карапайым калкты тирүү калкан катары колдонууну улантып жатканын билдирди.
ХАМАС радикал уюму ал аймакта жоочулары болбогонун маалымдаган билдирүү таратты. Израил тарап да, хамасчылар да өз билдирүүлөрүн ырастаган далилдерди келтирген эмес.
- Былтыр 7-октябрда ХАМАС Газанын аймагынан Израилге кол салганда 1200дөй киши каза тапкан, 253 киши барымтага алынган. Ошондон бери бир нече киши бошотулуп, бир канчасы набыт болду.
- Израил чабуулга жооп кайтарып, анклавда согуш баштаган. ХАМАС көзөмөлдөгөн Газанын саламаттыкты сактоо мекемеси 40 миң 600дөн көп киши каза тапканын билдирди. Бириккен Улуттар Уюму набыт болгондордун көбү аялдар менен балдар экенин буга чейин маалымдаган.
- Тилкенин 2,3 миллион калкынын көбү бир нече жолу жер которууга аргасыз болду. Аймакта тамак-аш, дары-дармек жетишпей, гуманитардык кризис курчуп турат.
Дагы караңыз
Кыргызстанга ЖККУга мүчө мамлекеттердин депутаттары келдиКийинки VI Дүйнөлүк көчмөндөр оюндары Кыргызстанда өтөтМушкер Ахмади Арваз уландар арасында Азия чемпиону болду