Жогорку Кеңеш 14-марттагы жыйынында талаштуу “Коммерциялык эмес уюмдар жөнүндө” мыйзам долбоорун үчүнчү окууда талкуусуз кабыл алды. Документке 66 депутат “макул”, беш депутат “каршы” добуш берди. Жыйында долбоор тууралуу бир да суроо берилген жок. Мыйзам долбоору эми президентке кол коюу үчүн жөнөтүлөт.
Парламенттин Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин регламенти боюнча комитети 14-мартта “Коммерциялык эмес уюмдар жөнүндө” мыйзам долбоорун үчүнчү окууда колдогон. Бул күнгө тармактык комитеттин жыйыны дайындалган эмес. Бирок анын төрагасы Чолпон Султанбекова парламенттин жалпы жыйынында комитетте карала турган маселелер бар экенин айтып, ал үчүн танапис сураган. 15 мүнөттүк танапис берилип, “чет элдик өкүл” долбоору үчүнчү окууда кабыл алынып, парламенттин күн тартибине киргизилген.
Буга чейин айрым депутаттар долбоор кабыл алынса билим берүү, гендердик теңчилик жана социалдык маселелерди чечүү боюнча иштеген уюмдарга кедергисин тийгизе турганын айтышкан.
Коомчулукта “чет элдик өкүл” деген ат менен таанылган “Коммерциялык эмес уюмдар жөнүндө” мыйзам долбоору 2023-жылы 25-октябрда Жогорку Кеңеште биринчи окууда кабыл алынган. Автору Надира Нарматова “бул документ өкмөттүк эмес уюмдардын ишине тоскоол болбойт” деп айтып келет.
Башта Кылмыш-жаза кодексине өзгөртүүлөрдү киргизүү сунушу берилип, “Коммерциялык эмес уюм мыйзамсыз иш-аракет жүргүзгөн” деп табылып, шектүүнүн күнөөсү далилденсе, беш жылдан 10 жылга чейин эркиндигинен ажыратуу каралган. Кийин ал үч жылдан беш жылга чейин кыскартылып, 20-февралда кылмыш жоопкерчилиги толук алынып салган.
“Адилет” укуктук клиникасы Надира Нарматова негизги автор болгон документти иликтеп чыгып, ал Орусиянын “Чет элдик агенттер жөнүндөгү” мыйзамына 98% окшош экенин аныктаган.
Эл аралык Журналисттерди коргоо комитети (СPJ) Жогорку Кеңешти Орусиянын репресивдүү мыйзамынын мисалында жазылган талаштуу мыйзам долбоорун кабыл албоого чакырган. Баш кеңсеси Нью-Йоркто жайгашкан уюм бул документ Орусиядагыдай эле “бир катар бейөкмөт уюмдардын жабылышына” түртөрүн эскерткен.
Жогорку Кеңештин да айрым депутаттары Кыргызстанда өкмөттүк эмес уюмдар ансыз деле Салык кызматына каражаты тууралуу отчёт берип жатканын, документ алардын ишин көзөмөлдөп, жабууга чейин алып барарын билдиришкен. (BTo)
Дагы караңыз
Тармактык комитет “чет элдик өкүл” долбоорун үчүнчү окууда кабыл алдыБишкекте көк бөрү боюнча Нооруз мелдеши өтүп жатат"Газпром Кыргызстан" Ошко газ аз келип калып жаткан себебин айтты Депутат былтыр 2 миңден ашык дарыгер жумуштан кеткенин айттыЭл артисти Талгарбек Жакшылыков дүйнөдөн кайттыМурдагы айыл чарба министри Чодуев кармалды Садыр Жапаров абактагы Бекназаровдун кайрылуусуна жооп берди Дарыгерлерге иш учурунда кол салгандарга жазаны күчөтүү сунушталдыПрезидент Көлбаев, Матраимовду кабыл алып, эскертүү бергенин билдирдиЖалал-Абадда кызамыкка каршы жапырт эмдөө башталды