Кыргыздарга тиешелүү манжу тилиндеги 3,5 миңдей документ же 35 миң беттей барактагы архивдик материалдар сатып алынды.
"Мурас” фондунун төрагасы, тарыхчы Кыяс Молдокасымовдун Фейсбук баракчасына жазганына караганда, архивдик документтер президенттик фонд бөлгөн каражатка алынган.
"Архивдик документтердин бардык көчүрмөсү 283 томго топтолгон. Бул томдуктардын ичинде кыргыздарга тиешелүү 3,5 миңдей документ же болбосо 35 миң беттей баракта ар кандай маалыматтар бар. Канатбек Абдужапар уулунун кабарлоосуна караганда, Адигене уруусуна тиешелүү эле 400-500дөй документ бар. Бул документтердин арасынан 40 уруу кыргыздын ар бирине тиешелүү маалыматтарды табууга болот. Документтер манжу тилинен кыргыз тилине которулганда ага күбө болобуз...Бул 283 томдогу архивдик документтердин көчүрмөсүнүн баасы 5 миллион сомдун тегереги болсо, биз кытайлык кесиптештерибиздин жардамы менен жарым баасына жетпеген каражатка сатып алдык. Буюрса бул 10 төөгө жүктөлүүчү томдуктар Бишкекке алып келинет ", - деген Молдокасымов.
Тарыхчы алдыда эски ханзу, монгол тилинде өз доорунда жазылган кыргыздарга тиешелүү дагы 70 миң беттей архивдик документтер бар экенин, алардын көчүрмөсү да өз кезегинде ушинтип сатып алынарын жазган.
2023-жылы март айында Кытайдан табылган архивдик документтерди которуу үчүн "Мурас” фондуна президенттик фонддон 13 млн сом бөлүнгөн.
Буга чейин фонддун башкармалыгынын төрагасы Кыяс Молдокасымов Кытайдан табылган 10 миң бетке жакын архивдик документтерди байыркы кытай тилинен азыркы кытай тилине, андан кыргыз тилине котортуу үчүн каражат бөлүүнү бийликтен өтүнгөн. (КЕ)
Дагы караңыз
ИИМ каржы пирамидасын уюштурууга шектүү кыздар кармалганын билдирдиОрусияда сот Навальныйдын фамилиясын "экстремисттик" символикаларга теңештирген чечим чыгардыБайден Газа тилкесине гумжардам аба аркылуу жеткирелерин билдирдиМурас-Ордо конушунда беш бала тоңгон көлмөгө түшүп кетти