Соттор кеңеши 12-октябрдагы жыйынында Тартип комиссиясынын корутундусун карап, алты судьяны жоопкерчиликке тартуу сунушун жана арыздарды четке какты. Соттор кеңеши маалымдагандай, жыйында Башкы прокуратуранын Бишкектин Октябрь райондук сотунун судьясы Кубанычбек Касымбековду жана төраганын милдетин аткаруучу Элмира Барыктабасованы жоопкерчиликке тартуу сунушу колдоо тапкан жок.
Ошондой эле бир катар жарандардын Сузак райондук сотунун судьясы А. Койломбаеваны, Сүлүктү шаардык сотунун судьялары Акылбек Турусбеков менен Урматбек Садыковду жана Бишкектин Биринчи Май райондук сотунун судьясы Миран Шерматовду жоопко тартуу өтүнүчтөрү да канааттандырылбады.
Маалыматта аталган судьяларды жоопкерчиликке тартуу сунуштарынын себептерин жазылган эмес.
Буга чейин Соттор кеңеши Бишкек шаардык сотунун судьясы Назгүл Илиязова менен Бишкектин Ленин райондук сотунун судьясы Нурлан Кенжебаевди кылмыш жоопкерчилигине тартууга макулдук берген. 22-сентябрда Башкы прокуратуранын Ысык-Көлдүн Тоң райондук сотунун мурдагы судьясы Ниматилла Каримбековду кылмыш жоопкерчилигине тартуу сунушу колдоо тапкан.
Соттордун дарегине сын 20-сентябрда Бишкектин четиндеги Селекция айылынын тургунун мурдагы күйөөсү мыкаачылык менен бычактагандан кийин күчөгөн. Кылмышка шектүүнү буга чейин "Зордуктоо" беренеси менен айыптаган Сокулук райондук соту үч жылга пробациялык көзөмөлгө алуу менен эркиндикке чыгарып жиберген. Башкы прокуратура Чүй облустук сотунун үч судьясын "апелляциялык арызды кароону кечиктиргени үчүн үрөй учурган окуя болду" деген жүйө менен кылмыш жоопкерчилигине тартууга сунуш берген.(ZKo)
Дагы караңыз
Ооганстанда күчү 6,3 баллдык дагы бир жер титирөө болду Израилдин армиясы Газадагы операциясын күчөтүп жатканын билдирди Херсондо Орусиянын соккусунан киши өмүрү кыйылды “Чет элдик өкүл” мыйзамы: Эл аралык уюмдар эмнеге кабатыр?