Парламенттеги башкаруу коалициясы азырынча өкмөт башчылыкка талапкер сунуш кыла элек. Бул тууралуу Жогорку Кеңештеги көпчүлүк коалициянын лидери Иса Өмүркулов «Азаттыкка» билдирди. Анын айтымында коалиция өкмөт башчылыкка талапкерди президенттин инаугурациясынан кийин сунуш кылат.
«Президент шайланды. Эми инаугурациядан соң премьер-министрликке талапкерлер расмий көрсөтүлүшү керек. Парламенттик көпчүлүк өкмөт башчынын талапкерлигин азыркы Конституцияга ылайык көрсөтөт. Бизге учурдагы абалыбызга жараша такшалган, тажрыйбалуу, экономиканы, чарбаны түшүнгөн адис келиши керек. Күткөнгө, үйрөнгөнгө убакыт жок», - деди Иса Өмүркулов.
Азыркы Баш мыйзамга ылайык, президент башка мамлекеттик кызматты ээлөөгө укугу жок. «Ата Мекен» партиясынын лидери Өмүрбек Текебаев Конституция боюнча Садыр Жапаров премьер-министрлик кызматын инаугурацияга чейин тапшырып берүүгө тийиш экенин билдирүүдө. Анын айтымында, Жапаров өкмөт башчылыкты өткөрүп бергенден кийинки 15 күн ичинде башкаруучу коалиция жаңы премьер-министрди тандап, жарыялашы керек.
Учурда Кыргызстанда премьер-министрдин милдетин биринчи вице-премьер-министр Артем Новиков аткарууда. Ал президенттик шайлоого катышуу үчүн кызматын убактылуу өткөрүп берген Садыр Жапаровдун ордуна иштеп жатат. Ал эми президенттик шайлоодо атаандаштарынан арбын добуш алган Садыр Жапаровдун президенттик шайлоодо жеңгени расмий жарыяланса, ал өкмөт башчылык кызматка кайтпай турганы кабарланган. Өкмөттүн маалыматтык камсыздоо бөлүмүнүн башчысы Бактыбек Рысалиевдин «Азаттыкка» билдиргени боюнча Жапаров инаугурацияны күтөт, президент катары ант берген соң өкмөт башчылыкты расмий тапшырат.
Садыр Жапаров 2020-жылдын октябрындагы парламенттик шайлоодон кийинки нааразылык коштогон бийлик алмашуудан соң өкмөт башчы жана президенттин милдетин аткаруучу болуп иштеген. Андан соң президенттик шайлоого талапкерлигин коюп, кызматтарды тапшырган.
Учурда президенттин милдетин Жогорку Кеңештин спикери Талант Мамытов аткарууда.
БШКнын баштапкы маалыматына караганда, 10-январда 17 талапкер катышкан президенттик шайлоодо Садыр Жапаров 79% көбүрөөк добуш алган.
Президенттик шайлоодо утуп чыккан талапкер Борбордук шайлоо комиссиясы (БШК) шайлоонун жыйынтыгын расмий жарыялагандан кийин бир айдан соң кызматка кирише алат.
БШКнын төрайымы Нуржан Шайлдабекова расмий жыйынтык добуштар кол менен саналып, бардык арыздар жана талаштуу маселелер сотто каралып бүткөндөн кийин, бир ай аралыгында чыгарыларын билдирген. (ZKo)
Дагы караңыз
«Супара» интерактивдүү музейи негизделди2020-жылы Кыргызстандын экономикасы 8,6% төмөндөдү Башкы прокуратура: Айлана-чөйрөнү коргоо агенттиги мамлекетке ири өлчөмдө зыян келтиргенСот: Сайпидинов мамлекетке зыянды төлөп бергени үчүн үй камагына чыктыАКШнын Өкүлдөр Палатасы Трампка импичмент жарыялоо жөнүндө сунушту колдодуКолунан ажыраган жоокердин иши Жогорку сотко өттүHRW: Куугунтук менен зомбулук азайган жокКоронавирус дагы 136 адамга жукту, үч бейтап көз жумду