9-декабрда Жогорку Кеңештин алдына референдум өткөрүүгө каршы пикетке чыккан жарандык активисттер алтынчы чакырылыштагы парламенттин тарап кетишин талап кылышты. Акцияга чыккандардын бири, укук коргоочу Өндүрүш Токтонасыров бул чакырылыштагы депутаттар референдум өткөрүү тууралуу маселени кароого моралдык акысы жок экенин айтты.
Жарандык активисттер мамлекеттик башкаруу формасын өзгөртүү жөнүндө референдум өткөрүүгө каршылыгын билдирип, жекшемби сайын пикет, митинг, жүрүш уюштуруп келатышат. Алар өлкөдө авторитардык башкаруу, диктатура орнойт деп кооптонушууда.
9-декабрдагы жалпы отурумунда Жогорку Кеңеш 2021-жылдын 10-январында мамлекеттик башкаруунун формасын аныктоо боюнча бүткүл элдик референдум өткөрүү жөнүндө мыйзам долбоорун биринчи окууда кабыл алды. Жыйынга 62 депутат катышты. Алардын ичинен долбоорго депутаттар Өмүрбек Текебаев, Рыскелди Момбеков, Дастан Бекешев, Наталья Никитенко, Альфия Самигулина жана Евгения Строкова «каршы» добуш берди.
«Ата Мекен» фракциясынын лидери Өмүрбек Текебаев мыйзам долбоорун кабыл алуунун өзү мыйзамсыз экенин айтып, референдум тууралуу мыйзам долбоору тиешелүү жол-жоболордон өтпөй туруп, кабыл алынып жатканын белгиледи.
Парламенттик же президенттик башкарууну аныкташ үчүн референдум өткөрүү боюнча мыйзам долбоорун Жогорку Кеңештин депутаты Акылбек Жапаров иштеп чыккан. Ал долбоорду тиешелүү комитеттин корутундусунан кийин сессияга сунуштаганын маалымдаган.
4-октябрдагы кезектеги парламенттик шайлоодон кийинки нааразылыктан улам өлкөдө бийлик алмашкан. Мөөнөтүнөн мурда президенттик шайлоо 10-январга белгиленген.
Жогорку Кеңеш 17-ноябрда Конституциянын жаңы долбоорун коомдук талкууга чыгарган. Аны талкуулаш үчүн түзүлгөн Конституциялык кеңешменин жетекчилиги бүтүмүн 15-20 күндө чыгарып берерин айткан.
Бирок кийин өкмөт башчылык кызматты убактылуу өткөрүп берген жана алдыдагы президенттик шайлоого катышканы жаткан Садыр Жапаров шашуунун зарылчылыгы жок экенин айтып, референдумга башкаруу системасын аныктоо тууралуу суроону гана чыгарса туура болорун билдирген.
Президенттин укуктары кеңейтилген долбоорду колдогондор эгер ал кабыл алынса, Кыргызстанда бийликтин жоопкерчилиги күчөй турганын белгилеп жатышат.
Мыйзам долбоорун парламент кабыл алса, 2021-жылдын 10-январында президенттик шайлоо менен кошо конституциялык референдум да өткөрүлөт. (ZKo)
Дагы караңыз
Июнь коогалаңында жоголгон куралдар толук табыла элекБекешев: Жогорку Кеңеш «Референдум жөнүндө» мыйзамды кабыл ала албайтСаясатчылар тобу: Садыр Жапаров президенттик шайлоого катышпашы керекКыргыз-өзбек чек аралаш аймак жетекчилеринин үчүнчү жыйыны жыйынтыкталдыОнкологиялык оорулардан жабыркагандар бюджеттин кыскарганына нааразыПрезиденттин милдетин аткаруучу Мамытов КМШнын аткаруу комитетинин төрагасы Лебедев менен жолугуштуЖогорку Кеңеш референдумду дайындоо боюнча мыйзамды 1-окууда кабыл алдыАКШнын Жогорку соту Пенсилваниядагы шайлоонун жыйынтыгы тууралуу Трамптын арызын четке какты