Кыргыз өкмөтү «Референдум жөнүндө» мыйзам долбоорун колдойт. Бул тууралуу кыргыз өкмөтүнүн Жогорку Кеңештеги өкүлү Алмазбек Абытов бүгүн, 9-декабрда парламентте билдирди. Анын айтымында, өкмөт референдум өткөрүүгө, материалдык чыгымын көтөрүүгө даяр.
Жогорку Кеңеш 2021-жылдын 10-январында мамлекеттик башкаруунун формасын аныктоо боюнча бүткүл элдик референдум өткөрүү жөнүндө мыйзам долбоорун биринчи окууда кабыл алды. Парламенттин 9-декабрдагы жыйынына 62 депутат катышты. Алардын ичинен долбоорго депутаттар Өмүрбек Текебаев, Рыскелди Момбеков, Дастан Бекешев, Наталья Никитенко «каршы» добуш берди.
«Ата Мекен» фракциясынын лидери, депутат Өмүрбек Текебаев мыйзам долбоорун кабыл алуунун өзү мыйзамсыз деп билдирди. Ал эми мыйзам долбоорунун автору Жогорку Кеңештин депутаты Акылбек Жапаров айрым сын-пикирлер 2-окууда караларын айтты.
4-октябрдагы кезектеги парламенттик шайлоодон кийинки нааразылыктан улам өлкөдө бийлик алмашкан. Мөөнөтүнөн мурда президенттик шайлоо 10-январга белгиленген.
Жогорку Кеңеш 17-ноябрда Конституциянын жаңы долбоорун коомдук талкууга чыгарган. Аны талкуулаш үчүн түзүлгөн Конституциялык кеңешменин жетекчилиги бүтүмүн 15-20 күндө чыгарып берерин айткан. Бирок кийин өкмөт башчылык кызматты убактылуу өткөрүп берген жана алдыдагы президенттик шайлоого катышканы жаткан Садыр Жапаров шашуунун зарылчылыгы жок экенин айтып, референдумга башкаруу системасын аныктоо тууралуу суроону гана чыгарса туура болорун билдирген.
Президенттин укуктары кеңейтилген долбоорду колдогондор эгер ал кабыл алынса, Кыргызстанда бийликтин жоопкерчилиги күчөй турганын белгилеп жатышат. Ал эми алардын оппоненттери өлкөдө авторитардык башкаруу, диктатура орнойт деп кооптонушууда. Референдумга каршы активисттер жума сайын нааразылык акциясын уюштуруп жатышат.
Мыйзам долбоорун парламент кабыл алса, 2021-жылдын 10-январында президенттик шайлоо менен кошо конституциялык референдум да өткөрүлөт. (BTo/ZKo)
Дагы караңыз
Жогорку Кеңеш референдумду дайындоо боюнча мыйзамды 1-окууда кабыл алдыПрезиденттин милдетин аткаруучу Мамытов КМШнын аткаруу комитетинин төрагасы Лебедев менен жолугуштуБайтиктеги мектеп-интернатта балдар тамакка ууландыФерганада Кыргызстан премьеринин милдетин аткаруучу менен Өзбекстандын вице-премьери жолукту Лукашенко Эл аралык Олимпиада комитетин "банда" деп атадыФинпол автомектептердин салык төлөөдөн качуу схемасын аныктадыБУУ комитети кыргызстандык аял убактылуу кармоочу жайда дискриминацияга кабылган деп таптыИрандын Йемендеги элчиси АКШнын «кара тизмесине» кирди