Кылмыш дүйнөсүндө «Чач» деген каймана аты менен таанымал, уюшкан кылмыштуу топтун мүчөсү Эрнис Мурзахмедов тергөө иштери аяктаганга чейинки мөөнөткө камакка алынды. Мындай чечимди Биринчи май райондук соту 22-ноябрда чыгарганын Улуттук коопсуздук боюнча мамлекеттик комитеттин (УКМК) басма сөз кызматы 24-ноябрда кабарлады.
Маалыматка ылайык, уюшкан кылмыштуу топтун мүчөсү Эрнис Мурзахмедов 20-ноябрда кармалган. УКМК учурда анын кылмыш иштерине катышын иликтеп жатат.
УКМК октябрь-ноябрь айларында уюшкан кылмыштуу топтун мүчөлөрүн кармоо иштери жүрүп жатканын маалымдоодо. Эки ай аралыгында кылмыштуу топтун он чакты мүчөсү кармалганы кабарланган. Алардын бири - «мыйзамдагы ууру» атыккан Камчыбек Көлбаев. (ZKo)