Орус аскерлери 2022-жылдын жазында Беларустун Наровля шаарында фильтрациялык лагерь ачып, украиналык туткундарды кыйноого алып турган.
Мындай тыянакка «Азаттыктын» украин кызматынын "Схемы" долбоору менен радионун беларус редакциясы келишти.
Журналисттер спутниктен тартылган сүрөттөрдү, пропагандачылардын видеолорун, ал жакта отуруп чыккан туткундардан, хакерлерден алынган маалыматтарды талдап чыгышкан.
Иликтөөдө айтылгандай, "Припятский альянс" деген ишкананын аймагында орун алган фильтрациялык пунктта украин аскерлери менен катар карапайым жарандар да кармалчу. Сүрөттөргө шилтеме менен журналисттер орус аскерлери ал жакта бери дегенде 2022-жылдын май айына чейин жайгашкан болушу мүмкүн деген жыйынтыкка келишти.
Алсак, иликтөөчүлөр сөзгө тарткан украиналык жоокер Богдан Лысенко Наровлядагы лагерде ур-токмокко кабылганын, "сабалган кишилердин кыйкырыгы күнүгө угулуп турганын" айтып берди.
Журналисттер ал жерге жүздөгөн жайкын тургундар алынып барган болушу мүмкүн деп жазышат.
Иликтөөдө белгиленгендей, лагерди беларус бийлигисиз ачуу мүмкүн эмес болчу, ал эми орус аскерлеринин иш-аракеттерин Женева конвенциясын бузуу деп сыпаттаса болот.
Журналисттер Беларустун авторитардык жетекчиси Александр Лукашенконун басма сөз катчысына кайрылышкан, бирок иликтөө жарыяланып жаткан чакта ал комментарий берүү өтүнүчүнө жооп берген эмес.
Орусия Украинага кол салардын алдында Беларуста машыгуу деген шылтоо менен куралдуу күчтөрүн жайгаштырган. 2022-жылдын февралында алар Украина менен чек араны бузуп өтүп, Киев жана Гостомел тарапка жылган. Беларус аймагынан украин шаар-кыштактары аткыланган. Беларус аскерлери ал операцияга катышкан эмес.
Лукашенко Москванын аракетин колдогону менен өлкөнүн армиясы Украина Беларуска кол салса гана согушка катышарын айткан.
29-ноябрга караган түнү орус армиясы Украинаны пилотсуз учактар менен аткылаганда Одесса облусунда жети киши жарадар болду. Бул тууралуу аймактын аскердик администрациясынын башчысы Олег Кипер маалымдады.
Анын айтымында, жараат алган төрт киши ооруканага жаткырылды, бир аялдын абалы оор, үчөөнө жеринде жардам көргөзүлдү. Соккудан облуста 13 турак жайга, чарбалык курулуштарга, газ түтүгүнө жана автомашинага зыян келтирилди.
Украинанын башкы прокурорунун кеңсеси Одессанын порт жана транспорт инфраструктурасы бутага алынганын билдирди. Буга байланыштуу согуш мыйзамдарын жана салттарын бузуу фактысы боюнча иликтөө башталды.
Жумага оогон түнү Киевге да сокку урулду. Мамлекеттик чукул кырдаалдар кызматы маалымдагандай, Днепр районундагы балдар бейтапканасынын кире бериши жарым- жартылай урап, терезелери күбүлүп түштү. Жараат алган кароолчу ооруканага жеткирилди.
Киевдин аскердик администрациясынын башчысы Сергей Попко ошол эле райондо көп кабаттуу үч үй зыян тартканын, бир киши жабыркаганын жазды.
Украинанын Аба күчтөрү 29-ноябрга караган түнү Орусия 132 дрон менен чабуул койгонун билдирди. Жергиликтүү саат 9.00го карай 88 учкучсуз аппарат атып түшүрүлгөнү кабарланган.
Орусия украин аймагын, энергетикалык, жарандык инфраструктураны, турак үйлөрдү тынымсыз аткылап, далилдерге карабай аскердик жайларды гана бутага алганын айтууда.
Орусиянын Ростов облусундагы Каменск районунда украин дрондорунун түнкү чабуулунан кийин "Атлас" мунай базасы күйүп жатканын “Свобода” радиосу геолокацияга таянып тактады.
Ишкана орус армиясын күйүүчү май менен камсыздап турат.
Украиналык учкучсуз учактар ошол эле базага 3- жана 28-августта да сокку урушканы кабарланган.
Өрттүн сүрөттөрүн Astra жана Baza Телеграм-каналдары чыгарышты. Күбөлөр анын алдында жарылуунун добушу угулганын айтышууда.
Аймактын губернатору Юрий Слюсардын айтымында, өрттү өчүрүүгө 100дөн ашуун киши жана 38 даана техника катышууда.
Расмий билдирүүдө база эмес, өнөр жай объектисинде өрт чыкканы айтылган.
Сөз болгон район Украинанын орус аскерлери басымдуу бөлүгүн басып алган Луганск облусу менен чектешет.
Орусиянын Коргоо министрлиги жума күнү Ростов, Краснодар, Белгород, Брянск жана Воронежде, аннексияланган Крымда украиналык 47 дрон атып түшүрүлгөнүн билдирди.
Киев бийлиги жана куралдуу күчтөрү түнкү чабуулдарды комментарийлеген жок.
Ал тапта орус армиясы Украинаны тынымсыз аткылап, жумага караган түнү Одесса облусунда жети киши жарадар болду.
Киевде дрон соккусунан балдар бейтапканасынын имараты зыян тартты.
Орусия кыштын жакындашы менен кошуна өлкөсүнүн энергосистемасын бутага алууда.
Украина жапырт аба чабуулуна кабылды
28-ноябрда эртең менен Украинанын бир катар аймагы орусиялык күчтөрдүн аба чабуулуна кабылды. Өлкө боюнча коопсуздук сигналдары үзгүлтүксүз жаңырууда.
Украиналык Аба күчтөрү саат 6:00 чамасында бир нече облуска ракеталар жана дрондор учуп келаткандыгын жарыялашты. Атап айтканда, Винница, Харьков, Бердичев, Хмельницкий, Красилов, Стрый (Тернополь облусу), Ровно облусу жана Волынь аймактары аталды.
Саат 6:00дөн кийин Харьков шаары үч ирет аба чабуулуна дуушар болду. Жергиликтүү бийлик өкүлдөрү чабуулдар жөнүндө кеңири маалымат берди:
Облустук мамлекеттик администрациянын төрагасы Олег Синегубов: "Үч чабуул тең Харьковдун Киев районуна жасалды. Учурда адам өмүрү кыйынлган жок” деп билдирди.
Шаар башчысы Игорь Терехов болсо: "Алдын ала маалыматка ылайык, бардык чабуулдар Харьковдун Киев районундагы бир жарандык ишкана аймагына жасалды", - деп түшүндүрдү.
Учурда Украинанын бүтүн аймагы Орусиялык аскерлердин сокку уруучу дрондорунун жана ракеталарынын массалык аба чабуулуна дуушар болууда.