Украина 27-ноябрга караган түнү да Орусиянын дрон чабуулуна кабылды. Бул тууралуу жергиликтүү бийлик өкүлдөрү кабарлашты. Алардын айтымында, жайкын тургундар арасында жабыркагандар бар.
Киев облустук аскердик администрациясынын маалыматына караганда, атып түшүрүлгөн дрондордун сыныктары борбор калаанын Днепровский районунун аймагына түшүп, кеминде бир киши жараат алды. Аны ооруканага жеткиришти.
Жалпысынан жабыркагандар үч киши деп эсептелип жатканы, алардын экөө медициналык жардамга муктаж экени маалымдалды. Бул тууралуу Киев мэри Виталий Кличко билдирди.
Ал эми Запорожье облусунда, аймактын башчысы Евгений Балицкий маалымдагандай, электр зымдары үзүлүп, жалпы облус жарыксыз калды, азыр адистер калыбына келтирүү иштерин жүргүзүп жатышат, негизги маанилүү объектилер генераторго туташтырылды.
Кечээ Украина Орусиянын "рекорддук сандагы" дрон соккусуна кабылганын билдирген. "Искандер-М" ракеталарынан төртөө, согуштук дрондордон 188и колдонулганы, алардын 76сы 16 облус аймагында, анын ичинде Киев облусунда атып түшүрүлгөнү маалымдалган. Борбор калаада абадан эскертүү беш саат уланган. Дрон сыныктарынан үйлөр, электр зымдары талкаланган. (
Орусия күчтөрү эртең менен Харьковдун борборун аткылап, кеминде 15 киши жабыркады
Орус аскерлери 25-ноябрь күнү эртең менен Харьковдун борборун аткылап, кеминде 15 киши жабыркаганын облус башчысы Олег Синегубов билдирди.
"Шаардын борбордук бөлүгүнө, сокку турак жай курулуш аймагына тийип, көп кабаттуу үйлөрдүн айланасындагы короолорго түшүп, чарбалык курулмалар жана автоунаалар өрттөнүп кетти”, - деди ал.
Орус аскерлери ар кандай куралдар менен - согуштук дрондор, ракеталар, КАБдар, РСЗОлор менен - украин аймактарына үзгүлтүксүз чабуул жасап келе жатат.
Орусия жетекчилиги кеңири масштабдуу согуш учурунда орус армиясы Украинанын шаарлары менен айылдарынын жарандык инфраструктурасына атайын соккулар жасап, жарандык калкты өлтүрүп, ооруканаларды, мектептерди, бала бакчаларды, энергетика жана суу менен камсыздоо объектилерин талкалап жатканын танып келүүдө.
Украина бийлиги жана эл аралык уюмдар бул соккуларды Орусия Федерациясынын согуштук кылмыштары катары квалификациялап, алардын максаттуу мүнөзүн белгилешүүдө.
БУУ октябрь айынын аягына карата Орусиянын кеңири масштабдуу баскынчылыгы башталгандан бери Украинада 12 162 жарандын каза болгону жана 26 919 кишинин жаракат алганы тууралуу маалыматтарды тастыктай алганын билдирди. Уюм чыныгы көрсөткүчтөр алда канча жогору болушу мүмкүн экенин белгиледи.
Украинанын куралдуу күчтөрү Орусиянын контрчабуулунун жыйынтыгында август айында ээлеген жерлеринин 40 пайызга жакынын жоготту. Бул тууралуу Reuters агенттиги украин армиясындагы булагына шилтеме берип кабарлады. Украинанын Башкы штабынын өкүлү - агенттиктин булагы Орусия Курскиге 59 миңдей аскер алып киргенин айткан.
"Биз 1376 чарчы чакырым жерди көзөмөлдөп келгенбиз, албетте азыр ал аймак кыйла кичирейди. Душман контрчабуулун күчөтүүдө. Учурда 800 чарчы чакырым жерди гана көзөмөлдөп калдык. Биз колубуздан келишинче бул аймактарды кармап турууга аракет кылабыз", - деген аскер кызматкери.
Орусиянын Коргоо министрлиги Reuters агенттигинин учурдагы кырдаал тууралуу суроосуна жооп берген эмес.
Курск облусуна басып кирүү менен Украинанын Куралдуу күчтөрү Орусиянын чыгыштагы жана түндүк-чыгыштагы чабуулдарын токтото алганын "Азаттыктын" украин кызматы жазды.
Украин президенти Владимир Зеленский бир нече күн мурунку комментарийинде, Орусиянын президенти Владимир Путин АКШнын жаңы президенти Дональд Трамптын инаугурациясы боло турган 20-январга чейин украин күчтөрүн Курск облусунан чыгарууну максат кылганын белгилеген.
Түштүк Кореянын жана АКШнын чалгын кызматтары Орусия Курск аймагындагы согушка Түндүк Кореядан 10 миңдей жоокер алып келгенин билдиришкен. Алардын бир бөлүгү бул аймакта согушка киргени кабарланды.
АКШнын коргоо министри Ллойд Остиндин сөзүнө караганда, Вашингтон жакынкы убактарда түндүк кореялык миңдей жоокер украин аскерлерине каршы согушка кирерин күтүүдө.
Орусиялыктардын 53% Украина менен болгон согушту тынч сүйлөшүүлөрү менен чечүүнү колдойт. Russian Field изилдөө компаниясы ноябрда жүргүзгөн сурамжылоонун жыйынтыгында ушундай көрсөткүч чыккан. Изилдөөчүлөр бул согуш башталгандан берки эң жогорку көрсөткүч экенин айтышууда.
Согуштун уланышын суралгандардын 36% колдогон. Бул 2022-жылдын мартынан берки байкоолордогу минималдуу көрсөткүч болууда. Компаниянын баяндамасында тынч сүйлөшүүлөрдү жактагандардын санынын өсүшү жана согушту колдогондордун азайуу тенденциясы 2023-жылдын февралынан бери байкалып жатканы белгиленген.
Тынч сүйлөшүүлөрдү эң көп колдогондор жаштар (68%), аялдар (59%), аз камсыз болгон үй-бүлөлөр (59% жана интернет-медиалар менен Телеграм-каналдардын аудиториялары (51%дан) болгон. Кесиптик чөйрөлөрдөн тынч сүйлөшүүлөрдү IT, соода жана саламаттык сактоо кызматкерлери көбүрөөк жактаган. Ал эми өндүрүш тармагында иштегендер көбүнчө согуштун уланышын колдогон.
“Эртең” эле тынчтык келишимин түзүүнү суралгандардын 79% колдоп, 60% ок атышууну токтотуу келишими эч кандай шарттарсыз түзүлсө деген пикирге макул болушкан.
Суралгандардын 2/5 (бештен эки бөлүгү) согуштан улам өзүнө кооптуу болуп жатканын айткан. Дрондордун соккусу (27%), экономикалык абал (20%), аткылоолор (18%), мобилизация (17%) жана жакындарынын өлүмү менен кырсыкташы (12%) олуттуу кооптонууну жаратат.
Мурдараак, 19-ноябрда Gallup компаниясы да Украинадагы сурамжылоонун жыйынтыктарын жарыялаган. Ага караганда, согуш башталгандан бери Орусия менен кармашууну толук жеңишке чейин жүргүзүүнүн жактагандар дээрлик эки эсеге азайган. 2024-жылы суралгандардын 52% Киев тынч сүйлөшүүлөрдү мүмкүн болушунчу эртерээк башташы керек десе, дагы 38% согушту жеңишке жеткенче улантууну жактаган.