Жо Байден менен Кейр Стармер Вашингтондо жолугат
АКШнын президенти Жо Байден жана Британиянын премьер-министри Кейр Стармер 13-сентябрда Вашингтондо жолугушуу өткөрүшөт. Бул кездешүү Украина тарабынан АКШ жана Британия берген куралдарды Орусияга каршы колдонууну чектөөнү жеңилдетүү боюнча аракеттер күчөгөн учурга туш келди.
Жолугушуу АКШнын бул багыттагы саясаты өзгөрүшү мүмкүн деген белгилер пайда болгон учурда өтүүдө.
Буга чейин жолугушууда алыска атуучу куралдарды Орусиянын агрессиясына каршы колдонууга уруксат берүү меселеси дагы талкуулана турганы айтылган.
Украиналык аткаминерлер АКШнын мамлекеттик катчысы Энтони Блинкендин жана Британиянын тышкы иштер министри Дэвид Ламминин ушул жумада Киевге болгон сапары учурунда, Батыштан берилген узак аралыкка атылуучу ракеталарды Орусиянын ичиндеги буталарга колдонууга уруксат берүү өтүнүчүн кайра козгошкон.
Бул жолугушуунун жыйынтыгында АКШ жана Улуу Британия Украинанын энергетикасын калыбына келтирүү жана гуманитардык жардам үчүн дагы 1,5 млрд доллар бөлөрү айтылган.
АКШнын мамлекеттик катчысы Энтони Блинкендин айтымында, бул өлкө Украинага 700 млн доллар бөлөт. Анын 325 миллиону орус армиясынын чабуулунда талкаланган энергетикалык объектилерди калыбына келтирүүгө жумшалат. 290 миллионго жакыны тамак-аш, турак жай, медициналык кызмат көрсөтүү жана билим берүүгө сарпталат. Калган сумма миналарды зыянсыздандырууга керектелет.
Өткөн аптада АКШ 250 млн долларлык аскерий жардам берилерин жарыялаган.
Улуу Британиянын тышкы иштер министри Дэвид Лэмми анын өлкөсү гуманитардык жана насыя түрүндө 782 млн долларлык жардам бере турганын Киевде билдирген.
"Биздин Путинге жамааттык билдирүүбүз биздин колдообуз азайбай турганын билдирет”, - деди Блинкен.
Блинкен менен Лэмминин Киевге сапары учурунда бир нече жолу абадан айгай жаңырып, айрым иш-чаралардын убактысы жылдырылып, кээ бирлери болбой калды.
АКШнын мамлекеттик катчысы Энтони Блинкендин айтымында, бул өлкө Украинага 700 млн доллар бөлөт. Анын 325 миллиону орус армиясынын чабуулунда талкаланган энергетикалык объектилерди калыбына келтирүүгө жумшалат. 290 миллионго жакыны тамак-аш, турак жай, медициналык кызмат көрсөтүү жана билим берүүгө сарпталат. Калган сумма миналарды зыянсыздандырууга керектелет.
Өткөн аптада АКШ 250 млн долларлык аскерий жардам берилерин жарыялаган.
Улуу Британиянын тышкы иштер министри Дэвид Лэмми анын өлкөсү гуманитардык жана насыя түрүндө 782 млн долларлык жардам бере турганын Киевде билдирген.
"Биздин Путинге жамааттык билдирүүбүз биздин колдообуз азайбай турганын билдирет”, - деди Блинкен.
Блинкен менен Лэмминин Киевге сапары учурунда бир нече жолу абадан айгай жаңырып, айрым иш-чаралардын убактысы жылдырылып, кээ бирлери болбой калды.
Орусиянын Коргоо министрлиги Украина менен чектеш тилкесиндеги Курск облусунда украин аскерлерине каршы контрчабуул жүргүзүп жатканын расмий ырастады. Мекеменин 12-сентябрдагы маалыматында «эки сутка ичинде 10 калктуу пункт, анын ичинде Снагость кыштагы бошотулганы» айтылды.
Курскинин бир нече айыл-кыштагы украин аскерлеринин көзөмөлүнөн бошотулганын буга чейин согушту чагылдырып жүргөн блогерлер айтып чыгышкан, тийиштүү маалыматын АКШда жайгашкан Согушту изилдөө институту (ISW) да жарыялаган.
Орус аскерлеринин алдыга жылуусу 10-сентябрда башталган. Алар бир нече чакырым илгерилеп калганы маалымдалууда. Украиндер ээлеп алган Суджа райондук борборунда кандайдыр бир кармаш жүрүп жатканы тууралуу маалымат азырынча жок.
Украин президенти Владимир Зеленский 12-сентябрда Киевде Литванын башчысы Гитанас Науседа менен жолугушуудан кийинки пресс-конференцияда журналисттердин суроолоруна жооп берип жатып орус аскерлери Курск облусунда контрчабуул баштаганын тастыктады.
Ал "Бардыгы биздин украин тараптын планы боюнча жүрүп жатат", - деди, бирок андан башка эч нерсе тактап айткан жок.
Эл аралык Кызыл Чырым комитети Украинанын Донецк облусунун Веролюбовка айылындагы аткылоодон үч кызматкери каза болуп, дагы экөө жаракат алганын ырастады.
Уюмдун сайтында жарыяланган билдирүүдө сокку гуманитардык жардам таратыла турган жерге урулганы айтылат. Соккуда жергиликтүү тургундар жабыркаган эмес.
Донецк облустук прокуратура Кызыл Чырымдын жүк ташуучу машинелерине урулган соккунун сүрөттөрүн жарыялады. Аткылоолор тууралуу украин президенти Владимир Зеленский да айтып чыккан.
Орус армиясы Украинанын Сумы облусунун Конотоп шаарына чабуул жасады. Андан 10дон ашык адам жараат алып, айрым аймактар электр жарыгысыз калганы кабарланды. Ал арада Орусиянын Курскидеги контрчабуулу боюнча маалымат жарыяланды.
Конотоп шаарынын мэринин маалыматында, 12-сентябрга караган түнү "Шахед" дрондору жай тургундар жашаган үйлөргө тийип, кеминде 14 адам жараат алган. Конотоп шаарынын мэри Артём Семенихин учурда ооруканада жана башка социалдык маанидеги мамлекеттик мекемелерде электр жарыгын тез арада калыбына келтирүү аракети көрүлүп жатканын кабарлады.
"Душман шаардын борборуна, турак жай имараттарына сокку урду. Биз жергиликтүү тургундарды коопсуз жайларга жайгаштыра алдык деп ишенем. Мен азыр имараттар турган жерлерди так көрсөтө албайм. Баары менин көз алдымда күйүп атат. Жабырлануучулар, жарадар болгондор бар, бирок жоготуулар жок деп үмүттөнүп жатам".
Мэрдин айтымында, орус аскерлери шаардын борборун, турак жайларды аткылаган. Украиналык күчтөрдүн Башкы штабы ушул эле күнү орус армиясы Угледар багытында үч жолу чабуул койгонун билдирди. Бул шаарды орус аскерлери өткөн кыштан тарта басып алууга аракет кылып келет. Кырдаалга көз салган орусиялык блогерлер орус аскерлери түштүктөгү Павловка жана түндүк-батыштагы Водяное айылдары тараптан жакындап келе жатканын айтылууда.
Соңку апталарда орус армиясынын активдүү чабуулуна кабылган Украинанын Донецк облусундагы Покровск шаары борбордук суу түтүгүсүз калганын жергиликтүү бийлик кабарларды.
Маалыматка караганда, 12-сентябрдын таңында Орусиянын аткылоосунан улам Покровск менен кошуна Мирноград шаарын байланыштырган көпүрө талкаланган. Көпүрөнүн азыркы абалы тууралуу видеолор социалдык тармактарда тарап жатат.
Орусиянын Коргоо министрлиги бейшемби күнү орус аскерлеринин Курск аймагындагы контрчабуулдары тууралуу маалыматты расмий тастыктады. Орус аскердик департаментинин 12-сентябрда түштөн кийин жарыяланган билдирүүсүндө “эки күндүн ичинде 10 калктуу конуш бошотулганы”, анын ичинде Снагост айылы да айтылган.
Орус аскерлеринин контрчабуулу 10-сентябрда башталган. Колдо болгон маалыматтарга караганда, алар бир нече чакырым алдыга жыла алышкан.
"Түндүк" дивизияларынын операцияларында эки түн ичинде 10 калктуу пункт: Апанасовка, Бяхово, Вишневка, Викторовка, Взапное, Гордеевка, Краснооктябрьское, Обуховка, Снагость бошотулган", - деп айтылат расмий маалыматта.
11-сентябрда орусиялык аскерлер Курск облусунда контрчабуулга өтүп, украин армиясы буга чейин көзөмөлгө алган бир нече айылды кайтарып алууга жетишкени кабарланган. Бул тууралуу украиналык DeepState талдоо долбоору, аскердик талдоочу Роб Ли жана орусиялык бийликчил блогерлер жазган.
DeepState долбоорунун 11-сентябрдагы маалыматында Курск облусунун бир бөлүгүн көзөмөлдөгөн украин армиясынын батыш флангындагы абалы начарлаганы айтылат.
АКШда жайгашкан Согушту изилдөө институту (ISW) Курск облусунда орус күчтөрүнүн соңку эки күндөн бери жүргүзүп жаткан контрчабуулу боюнча баяндамасын жарыялады.
"Орус аскерлери Коренево кыштагынын чет жакасындагы Журавли деген калктуу пункттун чыгышындагы айрым позицияларды өз көзөмөлүнө кайтарып алышты. Бир күн мурда алар Снагость кыштагынын түндүк тарабында алдыга жылышкан", - деп айтылат баяндамада.
Институттун талдоочуларынын билдиришинче, Орусия Курск аймагындагы украин аскерлерин бөгөттөп, андан кийин жакшыраак уюшулган чабуулун баштап, аларды толук сүрүп чыгарууга камынып жаткан болушу мүмкүн.
Украинанын куралдуу күчтөрү Курск облусундагы контрчабуул тууралуу маалыматты азырынча расмий комментарийлеген жок. Салгылашуулар жүрүп жаткан шартта майдандагы окуялардын өнүгүшүн ыкчам текшерүү дээрлик мүмкүн эмес.
6-августта Украинанын армиясы Орусиянын Курск облусунун аймагында операция баштаган. Киев анын башкы максаты өз өлкөсүн орус чабуулдарынан коргоо үчүн “буфердик зона” түзүү экенин белгилеген.
Орусия айрым райондорун украиндер ээлеп алганын, бир нече жараны каза тапканын тастыктап, ал жакта өзгөчө кырдаал режими жарыялаган, жергиликтүү тургундарын эвакуациялаган.