Депутаттын тууганынын өлүмү үчүн жакындары дарыгерлерди айыптоодо, ал эми врачтар болсо тажрыйбалуу неврологго кол көтөргөн депутат Мурашевдин жоопкерчилигин кароону парламенттен өтүнүп жатышат.
Кыргызстандын акыйкатчысы депутаттын тууганынын өлүмүн ачык-айкын иликтөө үчүн Башкы прокурорго жана парламентке кайрылды. Акыйкатчы Бакыт Аманбаев тумоолоп ооруканага жаткан жаш келиндин көп өтпөй каза табышы кыргыз медицинасындагы толгон-токой көйгөйлөр тууралуу чоң талкууга жем таштоосу керек деген пикирде. "Соңку убакта Акыйкатчы институтуна да, ак халатчандардын ишмердигине да нааразы болуп кайрылгандар көбөйдү" деди Аманбаев:
- Саламаттыкты сактоо системасында коррупциялашкан түзүм пайда болгонуна, сапатсыз, арзан дары-дармектердин келип жатканына, тармак коммерциялашып кеткенине даттангандар көп. Ошондой эле дарыгерлердин карапайым калкка мамилеси өтө начар, адистик сапаты да жетишсиз экенин айтышат. Бирок ошол эле убакта дарыгерлердин да түзүлгөн шарты, айлык акысы аз.
Бакыт Аманбаев
Бирок акыйкатчы Аманбаевди бул окуяда депутатка ачык жан тартууда деп айыптагандар көп. “Республика” фракциясынан депутат Нурбек Мурашевдин таяк жегенин айтып, учурда дарыланып жаткан невролог Жамалбек Тургумбаев акыйкатчыга ишенбей калганын билдирди:
- Булар бир партиядан окшойт. Окуянын аягын кандай кылып бурмалап жиберишет деп коркуп турам.
Тургумбаев Улуттук госпиталдын неврология бөлүмүнүн башчысы. Ал буга чейин тууганы комага түшүп калганы үчүн анын жакындарынан, тагыраагы депутат Мурашевден токмок жегенин айтып, укук коргоо органдарына даттанган. Тургумбаев буга чейин депутаттын соккусунан улам төрт тиши кыймылдап калганын айткан, учурда тиштерин жулдуруп жатканы маалым болду.
Жаңжалдын чыгышына депутат Мурашевдин тууганы Алтынай Арстанбек кызынын 10-февраль күнү комага түшүп калганы себеп болгон. Ал ага чейин сасык тумоолоп, өтүшүп кеткендиктен ооруканага жаткырылган. Дарыгерлер кыздын бул акыбалга жетишине анын эжесин айыпташууда. Алардын айтымында, оорулуу капельница алып жаткан учурда картошка менен эт аралашкан тамак берилген. 28 жаштагы Арстанбек кызы 14-февраль күнү эсине келбеген бойдон каза тапты. Ошондон бери депутат жана анын туугандары менен врачтардын тиреши күчөгөндөй. Азыр бул окуя боюнча бир эмес эки комиссия түзүлүп, иштеп жатат. Маркумдун жасатын союу боюнча комиссиянын төрагасы, академик Миталип Мамытов азырынча так анализ чыга электигин айтты:
- Мен маркумдун жасатын ачууга толук катыштым, бирок так жыйынтык азыр белгисиз, анык боло элек. Жыйынтык чыкканда кабарлайбыз.
Миталип Мамытов “Республика” партиясынын саясий кеңешинин мүчөсү, врачтарга доомат койгон депутат Мурашев да ушул эле партиядан депутат.
Ал эми бул окуяда дарыгерлердин жоопкерчилигин Саламаттыкты сактоо министринин орун басары Марат Калиев жетектеген комиссия иликтөөдө.
Аталган министрликтин өкүлдөрү өзүнүн кызматкерлеринин айыбын ачабы же тескерисинче коргоп калабы азырынча белгисиз. Бирок окуя боюнча дарыгерлерди көбүрөөк айыптаган акыйкатчы Бакыт Аманбаевдин да бир тууган эжеси “Республика” партиясынан депутат. Андан тышкары депутат Мурашев акыйкатчыны шайлоодо Аманбаевге жан тартып, кайра добуш берүүгө себепчи болгонун Жогорку Кеңештин айрым депутаттары айтып чыккан. Айтор окуяны иликтеген комиссиялардын жыйынтыгы чыкканга чейин, маркумдун жакындары менен врачтардын тиреши токтобойт өңдүү.
"Азаттыктын" Бишкектеги журналисти. "Ыңгайсыз суроолор" телепрограммасынын алып баруучусу. 2009-жылы Ош Мамлекеттик университетинин журналистика факультетин аяктаган.
