Соңку маалыматка караганда, Баткен жана Лейлек райондорунда тажик күч түзүмдөрү менен болгон атышуудан кыргыз тараптан 13 адам каза тапты. "Азаттык" Баткен облустук ички иштер башкармалыгынан каза болгондордун тизмесин алды. Алар:
- Каратаев Сагын Калбаевич. Көк-Таш айылынын тургуну. 1977-жылы 26-июлда туулган.
- Тагаев Сүйүн Ураимович. Баткен шаарынын тургуну. 1969-жылы 14-мартта туулган.
- Каработоев Алтынбек Джалилович. Кадамдай шаарынын тургуну. 1982-жылы 18-майда туулган.
- Адбрахманов Баяман Гапарович Баткен шаарынын тургуну. 1998-жылы туулган.
- Үсөн уулу Рашид. Баткен шаарынын тургуну. 1973-жылы туулган.
- Ганиев Жамшит Кайимович. 1990-жылы туулган.
- Рахматжанова Мадина 2009-жылы туулган.
- Сайдаров Махаматрасул Махадасавоч 1985-жылы туулган.
Аскер кызматкерлери:
- Манасбек уулу Нурсултан 1992-жылы туулган. 2053 аскер бөлүгүнүн 3-топтун командири. Капитан.
- Юлдашев Бекзат Давлатжанович. 1991-жылы туулган. 2021 аскер бөлүгү.
- Кубанычбеков Эсентур Кубанычбекович 1991-жылы туулган. 2053 аскер бөлүгүнүн 3-атайын багыттагы отрядынын командири. Капитан.
Баткен милициясы дагы эки адамдын тек-жайын тактап жатат.
Куралдуу кагылышта 20 аскер кызматкери жарадар болду, экөөнүн абалы оор деп бааланууда.
Жалпысынан Баткен жана Лейлек райондорунда атышуудан кыргыз тараптан 134 адам жараат алды.
Бүгүн, 30-апрель күнү Ош шаарынын мэриясы Баткенге 500 миң сом бөлүп, жеке ишкерлер менен биргеликте дагы 2 миллион сомдук азык-түлүк жөнөттү.
Мындан сырткары Ош облусунан Баткенге 60 тонна гуманитардык жардам жиберилди. Анын басымдуу бөлүгү азык-түлүк, жалпысынан 17 тонна картошка, 3 тонна ун жана өсүмдүк майы чогултулган. Ага кошумча Ош облусунун жарандарынын демилгеси менен да жардамдар келе баштады.
Бул тууралуу Ош шаардык мэриясы менен өкмөттүн Ош облусундагы өкүлчүлүгүнүн басма сөз кызматтары кабарлады.
Шаардык мэрия Баткенде чек ара чырында жабыркаган тургундарга колдоо көрсөтүү максатында атайын эсеп ачып, атайын комиссиялык топ түзгөн.
Ош шаарында активдүү жаштардан, тургундардан, коомдук фонддордон турган атайын штабдар ачылып, азык-түлүк, акчалай жардам чогултуу уланып жатат.
Кыргызстан 29-апрелде тажик аскерлери менен куралдуу кагылыш болгон айылдарды коңшу өлкө ээлеп алды деп эсептебейт. Бул тууралуу 30-апрелде саат 11де өкмөттүн облустагы ыйгарым укуктуу өкүлү Өмүрбек Суваналиев билдирди:
“Куралдуу кагылыш кечээ болгон. Бирок аларды басып алды деп айтуудан алыспыз. Кишилер көчүрүлгөн жерлерде биздин посттор баары турат. Баткендин тегерегиндеги туугандарына кеткендерди кайра кайтарып жатабыз”.
Баткен облустук милициясы 29-апрелде Лейлек районунун Жаңы-Жер айыл аймагынын Борбордук айылына Тажикстандын аскердик техникасы, Интернационал айылынын “Жилой дом” участогундагы кыргыз жарандарынын үйлөрүнө тажик аскерлери кирип алганын, Интернационал айылынын башчысын барымтага алышканын маалымдаган.
Суваналиев айыл башчынын барымтага алынганы жөнүндө маалыматты териштирип жатышканын айтты.
Бириккен Улуттар Уюму (БУУ) кыргыз-тажик чек арасындагы соңку кырдаалга байланыштуу үн катты. Уюмдун баш катчысынын басма сөз өкүлү Фархан Хак 29-апрелдеги брифингде эл аралык уюм акыркы абалга тынчсыздануу менен көз салып жатканын билдирди.
“Биз акыркы кабарларды көрдүк, тынчсыздануу менен көз салып жатабыз. Эки тарап, Кыргызстан менен Тажикстан ок атууну токтотуу боюнча келишимге жетишкени тууралуу кабарыбыз бар. Эгер ушундай болсо, аны кубатташыбыз керек. Биз эки тарапты тең кандай гана чечилбеген маселе болбосун түз сүйлөшүүлөр аркылуу, тынч жол менен чечүүгө чакырабыз”,-деди.
29-апрелде кыргыз-тажик чек арасындагы абал кескин курчуп, ок атуу, адам өлүмү менен коштолду. Эки тарап ок атууну баштоого бири-бирин айыптап жатат.