Баткен облусундагы "Азаттык" радиосунун кабарчысы бүгүн, 29-апрелде эртең менен кыргыз-тажик чек арасындагы Баткен районунун Көк-Таш айылынан аялдар менен балдарды салган алгачкы микроавтобус Баткен шаарына келгенин маалымдады.
Көк-Таш айылынын тургундары Баткендеги мектептердин биринин имаратына жайгаштырылууда. Жаңжал чыгып, ок атышуу уланып жаткан айылдагы жайкын тургундарды алып келүү опурталдуу болуп жатканы айтылууда.
Баткен облустук ички иштер бөлүмүнүн басма сөз кызматы бүгүн эртең менен 5:45 чамасында Көк-Таш айылында жайгашкан аскер бөлүгүнө тажикстандык жарандар ок атуучу курал колдонуп, ошол айыл аркылуу өтүүчү Ош-Исфана жолунун боюндагы Тажикстандын Майский айылы тараптан жолдон өткөн автоунааларга таштар ыргытыла баштаганын кабарлаган.
Ок атышуудан 30 жаштагы жаран жарадар болуп, жергиликтүү айылдын ооруканасына жеткирилди.
Улуттук коопсуздук боюнча мамлекеттик комитеттин Чек ара кызматынын басма сөз бөлүмү 28-апрелде кечинде Кыргызстан менен Тажикстан чектешкен “Головной” тилкесинде чыккан чыр тууралуу маалымат берип, азыр абал чыңалган абалда деген.
"Головной" тилкесиндеги 28-апрелде болгон кагылышуудан тажик тараптан төрт, кыргыз тараптан үч адамга таш тийип жарадар болду.
УКМК Чек ара кызматы тажик тарап маалыматтарды бурмалап, эки элди козутуп жатканы тууралуу билдирүү таркатты. Кырдаалды жөнгө салуу боюнча Тажикстандын расмийлери менен байланышуу мүмкүн болбой жатканын кабарлады.
Улуттук коопсуздук боюнча мамлекеттик комитеттин Чек ара кызматы бүгүн, 29-апрелде таңкы саат 4:40тар чамасында Баткен районунун Көчө-Бою аттуу жеринде абал курчуп кеткенин кабарлады.
Чек ара кызматы: "Айылда тажикстандык тарап Кыргызстанга таандык тургундардын үйлөрүнө таш ыргытып, кырдаал курчуп кетти. Андан соң тажикстандыктар жолдон өтүп бара жаткан Кыргызстандын машинелерин мергенчи куралы менен аткылап башташкан. Алдын ала маалыматтар боюнча, кыргыз тараптан жарадар болгондор бар. Тажик тараптын ок атуусу токтобой жатат. Кыргыз-тажик чек арасындагы абал чыңалууда. Тажикстандын чек ара кызматынын жетекчилиги менен телефондон байланышуу мүмкүн болбой жатат", - деген билдирүү таратты.
Баткен облустук ички иштер башкармалыгынын басма сөз кызматы бүгүн, 29-апрелде эртең менен 5:45тер чамасында Көк-Таш айылында жайгашкан аскер бөлүгүнө тажикстандык жарандар ок атуучу курал колдонуп, ошол айыл аркылуу өтүүчү Ош-Исфана жолундагы боюнда жайгашкан Тажикстандын Майский айылы тараптан жолдон өткөн автоунааларга таштар ыргытылып баштаганын кабарлады.
"Бул факты Баткен райондук ички иштер бөлүмүнүн Кылмыш жана жазыктарды каттоо реестрине Жазык кодексинин 266-беренеси (ээнбаштык) менен катталып, сотко чейинки өндүрүш ишке алынган.
Тажик тарап аткан октон Баткен районунун Көк-Таш айылынын 30 жаштагы тургунунун оң көзүнө ок тийип, айылдык ооруканага түшкөн. Бул жагдай да Баткен райондук ички иштер бөлүмү тарабынан катталып, Жазык кодексинин 39/130-беренеси (киши өлтүрүүгө аракет кылуу) менен катталып, сотко чейинки өндүрүш иши башталды.
"Азыркы учурда Көк-Таш айыл элинин коопсуздугун сактап, абалды турукташтыруу максатында милиция кызматкерлери күчөтүлгөн тартипте иш алып барууда", - деп билдирди Баткен облустук ички иштер башкармалыгынын басма сөз кызматы.
Баткендеги "Азаттыктын" кабарчысы азыркы тапта Көк-Таш айылынан жергиликтүү бийлик балдар менен аялдарды алып чыгып кете албай убара болуп жатышканын кабарлады.
Улуттук коопсуздук боюнча мамлекеттик комитеттин Чек ара кызматынын басма сөз бөлүмү 28-апрелде кечинде Кыргызстан менен Тажикстан чектешкен “Головной” тилкесинде чыккан чыр тууралуу маалымат берип, азыр абал чыңалган абалда деп билдирген.
"Головной" тилкесиндеги 28-апрелде болгон кагылышуудан тажик тараптан төрт, кыргыз тараптан үч адамга таш тийип жарадар болгону айтылган.
УКМКнын Чек ара кызматы "тажик тарап маалыматтарды бурмалап, эки элди козутуп жатат" деп билдирүү таркатты.