30-апрелдин эртең мененки саат 7:50сүнө карата расмий маалымат боюнча кыргыз-тажик чек арасындагы жаңжалдан каза болгон кыргызстандыктар 13кө жетти. Бул тууралуу “Азаттык” радиосуна Саламаттык сактоо жана социалдык өнүктүрүү министрлиги кабарлады.
Мекеменин маалыматына караганда, жараат алгандардын жалпы саны 134 адам. Алардын 25ин атайын учак менен Баткенден Бишкекке алып келип, үч ооруканага жаткырышты. Эки бейтаптын абалын дарыгерлер оор деп баалап жатышат, калгандары орточо жана канааттандырарлык абалда.
Баткен шаарында кыргыз-тажик чек арасында чыккан жаңжалдан улам эвакуация болгон тургундарды жайгаштыруучу алты жай иштеп жатат. “Азаттык” радиосунун кабарчылары 30-апрелде жеринен маалымдагандай, адамдарды негизинен мектептерге тийиштүү имараттарга жайгаштырып жатышат.
Алар Баткен районунун Кызыл-Бел жана Көк-Таш айылдарынын тургундары, негизинен аялдар, балдар жана кары-картаңдар.
Облус бийлиги жалпысынан эки-үч миңдей адам эвакуация болгонун 29-апрелде билдирген.
Баткенде кыргыз-тажик чек арасында чыккан жаңжал учурунда каза болгон аскердин сөөгү Бишкекке жөнөтүлдү. Бул тууралуу 30-апрелде "Азаттык" радиосуна агасы Амантур Кубанычбеков билдирди.
Анын айтымында, иниси Эсентур Кубанычбековду Баткенге Нарындан 13-апрелде жөнөтүшкөн. 30 жаштагы аскер Нарындын Ак-Муз айылында туулган.
Командирлик кызматты аркалап жаткан жоокер 30-апрелге караган түнү каза болгону айтылды. Ал үч бир туугандын ортончусу болчу.
Коргоо министри Таалайбек Өмүралиев Баткенде облустук администрациянын алдында бүгүн 30-апрелде эл менен жолугушуу өткөргөнүн “Азаттыкка” жергиликтүү тургундар билдиришти.
Өмүралиев элди сабырдуулукка чакырып, кырдаал акырындык менен жөнгө салынып жатканын билдирген. Жолугушууга вице-премьер-министр Артем Новиков жана өзгөчө кырдаалдар министри Бообек Ажикеев да катышты.