Баткен облусунун Тажикстан менен чектеш аймактарда чыккан жаңжалдан жабыркагандарга жардам көрсөтүү үчүн Таластан Баткенге жети дарыгер жөнөп кетти.
Бул тууралу өкмөттүн Таластагы өкүлчүлүгү маалымат таратты. Жолго чыккан дарыгерлердин кесиби хирург-травмотолог.
Аларды 30-апрель түнү облус башчысы Бакытбек Нарбеков узатты.
Баткенде 30-апрелдин эртең мененки саат 9:30уна карата абал боюнча эки башка маалымат келүүдө. Баткен облустук ички иштер башкармалыгынын басма сөз кызматы “Баткен районунда кырдаал турукташып, ок атуулар токтотулган. Баткен районунун Аксай, Ак-Татыр, Самаркандек айыл аймактарына өзгөчө тартиптеги күчөтүлгөн режим киргизилген” деп маалымдады.
“Азаттык” радиосунун кабарчылары жеринен маалымдагандай, ар жерден ок атылганы кээде дале угулуп жатат.
30-апрелге оогон түнү Тажикстандын Улуттук коопсуздук комитетинин башчысы Саймумин Ятимов менен кыргыз өкмөтүнүн Баткен облусундагы ыйгарым укуктуу өкүлү Өмүрбек Суваналиев биргелешкен документке кол коюп, кагылышты токтотууну, аскерлерди жана аскер техникасын мурда жайгашкан жерине алып кетүүнү макулдашышкан.
Мамлекеттик чек арада чыңалууну болтурбоо жана күчөтпөө боюнча чаралар көрүлүп жатат. Баткенге вице-премьер-министр Артем Новиков башында турган жумушчу топ иш алпарууда. Жумушчу топ жерине баргандан бери жаңжалды жөнгө салуу боюнча бир катар чараларды көрдү. Мындай маалымат президент Садыр Жапаровдун “Фейсбуктагы” баракчасына жарыяланды.
Ошондой эле кыргыз-тажик тилкесиндеги абал турукташып, аны Жапаров көзөмөлгө алганы, кырдаал сүйлөшүүлөрдүн жүрүшүндө жөнгө салынганы айтылат. Мындан тышкары зырыл болгон дары-дармек, азык-түлүктөр Баткен облусуна жеткирилген.
“Эки өлкөнүн чек ара аймактарындагы куралдуу жаңжалды жөнгө салуу боюнча Кыргызстандын жана тажик өкмөттөрүнүн демилгеси менен түзүлгөн комиссиялар, окуянын себептери менен кесепеттерин талкуулады. Куралдуу кагылышууну токтотуп, жеке бөлүктөрдү жана аскер техникаларсын туруктуу жайларына чыгарып кетүү жөнүндө билдирүүгө кол коюшту”, - деп жазылат маалыматта.
Баткенде кыргыз-тажик чек ара тилкесинде жайгашкан айылдар жана чек ара тозотторундагы абал боюнча "Азаттыктын" кабарчысы жеринен маалымат берди.
Соңку маалыматка караганда, айрым айылдар толук өрттөлдү, май куюучу жайлар, дүкөндөр тонолуп, талкаланды, кеминде беш чек ара тозоту жабыркады.
Баткен районунун Кызыл-Бел, Достук, Көк-Таш, Үч-Дөбө, Көк-Терек жана Ак-Сай айылдары жабыркады. Булардын ичинен Көк-Терек айылы толук жабыркап, бардык 17 үй күйүп кетти.
Лейлек районунда Борбордук, Арка, Интернационал, Жаштык, Максат айылдары жабыркады. Максат жана Арка айылдары көбүрөөк талкаланды. Борбордук айылындагы май куюучу 27 бекет толук өрттөлдү, дүкөндөр тонолду.
Чек ара тозотторунун бешөөнө ок тийип, өрт чыккан.
Облустук милиция ок атышуу токтогонун айтты, бейрасмий маалыматка караганда, айрым жерлерде ок атылып жатканы угулууда.