Кыргыз-тажик өкмөт башчылары чек арадагы кырдаалды талкуулады
Кыргызстандын премьер-министри Улукбек Марипов менен тажик өкмөт башчысы Кохир Расулзода 29-апрелде Татарстандын борбору Казан шаарында жолугушуп, кыргыз-тажик мамлекеттик чек арасында түзүлгөн кырдаалды талкуулады. Бул тууралуу кыргыз өкмөтүнүн басма сөз кызматы маалымдады.
Эки тарап чек арадагы чатакты сүйлөшүү аркылуу тез арада чечүүгө толугу менен даярдыгын билдирди.
“Эки өлкөнүн премьер-министрлери чек ара маселелерин чечүүдө күч ыкмаларын колдонууга жол берилбеши керектиги жана мындан ары карай чыр-чатакты ырбатууга жол бербөө максатында ыкчам чараларды кабыл алуу зарылдыгы боюнча бирдиктүү пикирин билдиришти”, - деп айтылат кыргыз өкмөтүнүн маалыматында.
Премьер-министр Улукбек Марипов Орусияда жумушчу сапар менен жүрөт. Ал бүгүн, 29-апрелде Татарстандын Казан шаарында Орусия өкмөтүнүн төрагасы Михаил Мишустин менен да жолукту.
Казанда Евразиялык өкмөттөр аралык кеңештин жыйыны өтүп жатат.
Дубнов: Чек арадагы чыр кыргыз тараптын кызыкчылыгында эмес
Кыргыз-тажик чек арасындагы жаңжалдын Душанбеде Жамааттык коопсуздук келишим уюмуна мүчө өлкөлөрдүн Коопсуздук кеңешинин катчыларынын жыйыны өтүп жаткан маалда чыкканы Тажикстан үчүн "ыңгайлуу болушу мүмкүн". Бул тууралуу Борбор Азия чөлкөмү боюнча эксперт Аркадий Дубнов “Настоящее время” каналына билдирди.
“Кыргызстан жетекчилиги туруктуу болбой турган жагдайда, УКМКнын жетекчиси Ташиев ден соолугуна байланыштуу чет өлкөгө кеткен учурда, өлкөдө ички саясий абал анча жакшы болбой турганда аскердик аракеттерди баштоого кызыкдар болмок беле? Бул алардын кызыкчылыгындагы иш эмес деп ойлойм. Азыр мендеги маалыматка караганда, тажик тарап оор техника менен минамет, тик учактарды колдонгону айтылып жатат. Өтө батыл башталган аскердик аракеттердин артында Тажикстандын Ворух анклавы менен байланыштырган жолду көзөмөлдөө үчүн кызыкчылыгы болушу мүмкүн” - деп билдирди Дубнов.
Чек ара: үч адам каза болду, алардын бирөө өспүрүм кыз
Баткен облусундагы кыргыз-тажик чек арасында 28-29-апрелде чыккан кагылышуулардан үч жаран каза болду, 84 киши жараат алды.
Каза болгондордун бирөө Лейлек районунан, 2008-жылы төрөлгөн кыз. Ал Баткен шаарындагы ооруканага бара жаткан жолдо үзүлгөнү маалым болду. Саламаттык сактоо министрлиги өспүрүм кыз октон алган жараатынан көз жумганын бышыктады.
Тажикстандын чек ара мекемеси жаңжалда тогуз адам жаракат алганын билдирди.
Кыргызстандын Чек ара кызматы тажик тарап «Капчыгай», «Миң-Булак», «Достук» чек ара тозотторуна, «Кожогар» жана «Булак-Башы» чек ара бекеттерине ок атканын кабарлады. «Достук» чек ара тозотунун имараты өрттөнгөнүн билдирди. Буга жооп иретинде кыргыз тарап Тажикстандын “Кожали” чек ара тозотун ээлеп алганы кабарланды.
Кыргызстандын Тышкы иштер министрлиги Тажикстандын дипломатиялык мекемеси менен сүйлөшүп, ок атууну 29-апрелде кечки саат сегизден тарта токтотуп, аскерлерди мурдагы ээлеген жерлерине кайтаруу макулдашылганын кабарлады.
Баткен облустук администрациясы кечки саат сегизден кийин деле чек арада ок атышуу уланып жатканын билдирди.
Президент Токаев кыргыз-тажик чек ара чырын тынчтык жолу менен жөндөөгө чакырды
Казакстандын президенти Касым-Жомарт Токаев Кыргызстан менен Тажикстандын чек арасындагы ок атышууну токтотуу тууралуу макулдашуусун кубаттарын билдирди.
Токаев коңшу эки өлкөнүн лидерлери талаштуу маселелерди тынчтык жолу менен чечерине ишенерин кошумчалады.
Акордонун расмий сайтындагы билдирүүдө «эки тараптуу ишенимди калыбына келтирүү жана туура чечимдерди издөө аракетине колумдан келген жардамды берүүгө даярмын» - деп айтылат.
Буга чейин Өзбекстандын тышкы иштер министрлиги коңшу мамлекеттерди ынтымыкка чакырып, «Ташкент абалды тез арада жөнгө салуу үчүн жардам берүүгө даяр", - деп билдирген.