Тажик бийлиги Исфара шаарынын башчысы жарадар болгонун билдирди
Исфара шаарынын акимчилигинин өкүлү «Азаттыктын» тажик кызматына аталган калаанын башчысы Баховаддин Баходурзодага 29-апрелде ок тийгенин ырастады.
Баходурзода суу сактагычтын башына ("Головной") барып, чек арадагы кырдаалды тынч жол менен чечүүгө аракет жасап жатканда ок тийгени кабарланды. Тажиктердин "Азия-Плюс" агенттиги ок шаар башчынын ийинине тийгенин жазды. Учурда ал Худжанд шаарындагы ооруканалардын биринде жатат.
Бул маалыматты «Азаттыктын» тажик кызматына Чоркух жана Ворух айылдарынын эки жашоочусу да ырастады.
Ош шаарында активисттер Баткен облусунун Тажикстан менен чектеш айылындагы жаңжалдан жабыр тарткандарга гуманитардык жардам чогулта башташты. Бул тууралуу "Азаттыкка" активисттердин бири Улан Канат уулу маалымдады.
Баткенде "Эл аралык толеранттуулук үчүн" коомдук фонду чек ара чырынан жабыр тарткандарга самын, балдарга жалаяк, жеке гигиенага керектүү каражаттарды, суу жана азык-түлүк чогултууда.
"Элсом" тиркемесинде атайын эсеп ачылды. Номуру 0558080557.
Баткенде чыр чыккан кыргыз-тажик чек ара тилкесинде жашаган 400дөй адам Баткен шаарындагы төрт мектепке караштуу имараттарга убактылуу жайгаштырылды.
Баткендин Лейлек районунда да кыргыз жана тажик чек арачыларынын атышуусу башталды. Чек арадагы Кара тилкесинде жайгашкан "Төрткүл” чек ара тозотунун имараты күйүп жатат. Бул тууралуу 29-апрелде саат 18:50дө өкмөттүн Баткен облусундагы өкүлү Өмүрбек Суваналиев билдирди. Облус жетекчиси кыргыз тараптын мүмкүнчүлүгү жетиштүү экенин кошумчалады.
Бир аз мурдараак Баткен районунун Көк-Таш жана Самаркандек айылдарынын үстүндө Тажикстандын тик учактары байкалды.