28-29-апрелде Баткендин Ак-Сай айылындагы Ак-Суу дарыясында жайгашкан башкы (“Головной”) суу бөлүштүрүүчү жайдын тилкесинде кагылыш болуп, 17 кыргыз жараны жараат алып, анын бирөө ооруканада көз жумду. Тажик тараптан жети адам жараат алды. Бул тууралуу эки өлкөнүн расмий бийлиги билдирди. 29-апрелде "Азаттыктын" кабарчысы Жеңиш Айдаров жеринен жиберген видео.
Баткенде чыр чыккан кыргыз-тажик чек ара тилкесинде жашаган 400дөй адам Баткен шаарындагы төрт мектепке караштуу имараттарга убактылуу жайгаштырылды. Бул тууралуу “Азаттык” радиосуна облустук администрациянын басма сөз кызматынын өкүлү Чолпон Бердикулова билдирди.
Анын айтымында, кечээ эвакуация болгондор негизинен аялдар, балдар жана кары-картаңдар. Бердикулова азырынча баары жетиштүү экенин айтты:
“Жергиликтүү бийлик, жарандык коргонуу органдары тамак-аш жана башка менен камсыздоо боюнча иштеп жатабыз. Аларга медицина кызматкерлери да коюлган. Мектептердин спорт залына, жыйындар залына, гимназия мектептеринин жатаканаларына жайгаштырылып, Өзгөчө кырдаалдар министрлигинен төшөнчү жана башкасы берилди".
Ички иштер министринин биринчи орун басары Сүйүн Өмүрзаков бүгүн, 29-апрелде кыргыз-тажик чек арасындагы соңку окуялардан улам Баткен облусуна барды. Бул тууралуу аталган министрликтин басма сөз кызматы кабарлады.
Өмүрзаков Баткенде облусттук ички иштер башкармалыгы, ИИМдин ички аскерлеринин колбашчысы менен жолугуп, коомдук тартипти күчөтүлгөн негизде камсыздоону талкуулады.
Милиция кызматкерлери блок посттор коюп, чек арага чектеш райондордогу жергиликтүү калкка түшүндүрүү иштери жүргүзүлүүдө. Жарандарды коопсуз райондорго жеткирүү иштери жүрүүдө. Ички иштер министрлиги чек арадагы абал чыңалган бойдон калууда деп маалымдап жатат.
Өзбекстандын тышкы иштер министрлиги Кыргызстан менен Тажикстандын чек арасындагы акыркы кырдаалдан улам билдирүү жасады.
Анда Ташкент эки тараптан тең жабыр тарткандар көбөйүп бара жаткандыктан, коңшуларды ынтымакка чакырды:
"Тараптарды кагылышууну дароо токтотууга үндөйбүз. Абалдын чыңалуусун азайтуу үчүн тараптар бирдей иш алып барып, бир пикирге келиши керек. Бүгүн талашка түшкөн бардык маселелер Борбор Азиядагы элдин ичинде салт болуп калган, кылымдар бою бузулбай келген ынтымактын, коңшулуктун жана өнөктөштүктүн алкагында чечилүүгө тийиш. Өзбекстан абалды тез арада жөнгө салуу үчүн жардам берүүгө даяр", - деп жазылат билдирүүдө.