Тажикстандын "Ховар" улуттук маалымат агенттиги өлкөнүн Чек ара кызматынын билдирүүсүнө таянып, кыргыз-тажик чек арасындагы чатактан эки жаран жараат алганын билдирди.
Тажикстандын Улуттук коопсуздук боюнча мамлекеттик комитетине караштуу Чек ара кызматынын билдирүүсүндө 29-апрелде Баткендин Көкташ айылына жакын жерде кыргыз чек арачылары ок атып, Чорку айылынын 32 жаштагы тургуну Окил Амаков башынан жараат алган.
32 жаштагы дагы бир тургун Саттор Самадов колу-бутунун бир нече жеринен жараат алган. Эки тургун тең Исфаранын борбордук ооруканасына жеткирилгени айтылат.
Ошондой эле билдирүүдө “Головной” суу бөлүштүрүүчү жайында 13.05те кыргыз чек арачылары ок атууну баштаганы кабарланган. 28-апрелде Тажикстандын чек ара мекемеси жети тажик жараны жабыркаганын билдирген.
Ал эми Кыргызстандын УКМКсына караштуу Чек ара кызматы тажик аскерлери Баткен районундагы Көк-Таш айылында жайгашкан "Головной" суу тосмо жайында миномет, пулемёт жана автоматтар менен массалык аткылоону 29-апрелде баштаганын жарыялаган. Андагы маалыматка ылайык, учурда окуянын жеринде Чек ара кызматынын төрагасынын орун басары Уларбек Шаршеев жүрөт. Буга чейин Баткен облусунун акимиятынын өкүлү төрт кыргызстандык жараат алып, ооруканага түшкөнүн билдирген болчу.
28-апрелде Баткен районунун Ак-Сай айылындагы Ак-Суу дарыясында жайгашкан башкы (“Головной”) суу бөлүштүрүүчү жайдын тилкесинде кагылыш болгон. 29-апрелде жергиликтүү бийлик Баткен районуна караштуу Ак-Татыр, Ак-Сай жана Самаркандек айыл аймактарын күчөтүлгөн тартипке өткөрдү жана Ак-Сайдын Көк-Таш айылынын айрым тургундарын Баткен шаарына чыгарып кетти. Андан соң бул жерде ок атылып жатканын жергиликтүү тургундар кабарлаган.
Кыргызстандын акыйкатчысы, күч түзүмдөрү боюнча мурдагы вице-премьер-министр Токон Мамытов Баткенде кыргыз-тажик чек арасында түзүлгөн кырдаалдан чыгуу үчүн чек араны жабуу зарыл деп эсептейт. Мындай пикирин ал 29-апрелде “Азаттыкка” курган маегинде айтты:
“Жайылып, чоң жаңжалга айланып кетпеш үчүн кыргыз өкмөтү чечим кабыл алып, чек араны жабышы керек. Бүт жаап, күчөтүлгөн режимге өтүп, нөлгө келтирип, “Силерге да жок, бизге да жок. Эл кыйналып жатат” деп отуруп, сүйлөшүү туура. Парламент чогулуп, ушул маселени президент менен карап, чечкиндүү кадамга барышы керек”.
28-апрелде Кыргызстандын Тажикстан менен чектеш аймагында, Баткендин Ак-Сай айылындагы Ак-Суу дарыясында жайгашкан башкы (“Головной”) суу бөлүштүрүүчү жайдын тилкесинде кагылыш болуп, кыргыз тараптан төрт, тажик тараптан жети адам жараат алганын эки өлкөнүн Чек ара кызматтары билдирген.
29-апрелде да жаңжал уланып, Кыргызстандын Чек ара кызматы “Тажикстандын чек ара аскерлери жана Ички иштер министрлигинин атайын багыттагы аскерлери «Головной» суу тосмо жайында миномет, пулемет жана автомат менен жапырт аткылоо башташты” деп маалымдады.
Коңшу өлкөнүн чек ара мекемеси чырды кыргыз тарап баштаганын айтууда.
Токон Мамытов 2009-жылы жана 2013-жылы Чек ара кызматын жетектеген.
Саламаттык сактоо жана социалдык өнүктүрүү министрлигинин 29-апрелдеги саат 16:30 карата маалыматына ылайык, Баткендеги кыргыз-тажик чек арасындагы жаңжалдан жабыркаган 11 адам ооруканага кайрылды. Анын ичинен 10 киши ар кандай жараат алганы белгилүү болду. Жети кишиге ок тийген. Анын үчөөнүн абалы орто оор, төртөө ырааттуу оор деп бааланып жатат. Учурда эки бейтапка операция жасоо чечими кабыл алынды.
Бейтаптарды тейлөө үчүн Ош шаарынан беш дарыгер Баткенге келди. Мындан тышкары Бишкек шаарынан да тогуз дарыгер барганы жатат.
28-апрелде чек арадагы Ак-Суу дарыясында жайгашкан башкы ("Головной") суу бөлүштүрүүчү жайдын тилкесинде кагылышуу чыккан.
29-апрелде жергиликтүү бийлик Баткен районуна караштуу Ак-Татыр, Ак-Сай жана Самаркандек айыл аймактарын күчөтүлгөн тартипке өткөрдү жана Ак-Сайдын Көк-Таш айылынын айрым тургундарын Баткен шаарына чыгарып кеткенин билдирди. (
Президент Садыр Жапаров бүгүн, 29-апрелде кыргыз-тажик чек арасындагы абал боюнча кечки саат 18:00дө “Фейсбуктагы” расмий баракчасына кайрылуу жазды.
“Кыргызстандын бардык жашоочуларын, биринчи кезекте саясий күчтөрдү жана жалпыга маалымдоо каражаттарын сабырдуулукка, чагымчылдыкка алдырбоого, кастыкты жана араздашууну козутпоого чакырам. Биз тажик эли менен дайыма тил табышабыз, биздин ынак коңшулук кызыкчылыктарды эске алып жана ынтымакты сактоо менен гана бардык маселелерди чечебиз. Азыр жаңжалды чыгарып, аны ичтен тутандырууга аракет кылгандар кооптондурат. Өлкө үчүн мындай оңой эмес учурда бардык ички саясий күчтөрдү сабырдуулукка чакырам”, - деп жазды Жапаров.
Ал арада Баткенде чек ара жаңжалында жараат алган бир адам каза болду. Бул тууралуу 29-апрелде Саламаттык сактоо жана социалдык өнүктүрүү министрлиги кабарлады.
Жалпысынан жараат алган кыргызстандыктардын саны 17ге жетти, бирөө үйдөн дарыланууда.