"Кыргызстандагы тажиктер" коомдук бирикмесинин биринчи вице-президенти тажик диаспорасынын башчысы Мавлянжан Абдураззаков Тажикстандын Тышкы иштер министрлигинин "Кыргызстанда этникалык тажиктер кысымга кабылууда" деген маалыматын төгүндөдү. Ал 23-сентябрда "Азаттык" радиосуна комментарий берип, Дүйшөмбү тараткан билдирүү чындыкка дал келбей турганын айтты.
Баткендеги соңку окуяларга байланыштуу Бишкекте Кожомкул атындагы Спорт ордосунда ачылган “Баткенге жардам” республикалык штабы ишин жыйынтыктады. Бул тууралуу 23-сентябрда “Азаттык” радиосуна маданият, маалымат, спорт жана жаштар саясаты министринин орун басары, штабды уюштуруу тобунун мүчөсү Союзбек Надырбеков билдирди.
Анын айтымында, бул штабга Баткенден үй-жайын таштап чыгууга мажбур болгон алты миңдей адам кайрылды, алардын эки миңге жакыны атайын жайларга, калгандары жакындарыныкына жайгаштырылды, элден чогултулган гуманитардык жардам да бөлүштүрүлүп бүттү.
Баткен облусунун Баткен районунда абал салыштырмалуу туруктуу экенин 23-сентябрда саат 15те район акими Учкунбек Жоробаев билдирди. Анын айтымында, 100 миң калкы бар райондун 60 миңге жакыны коопсуз райондорго эвакуация болгон.
"Кыргызстандагы тажиктер" коомдук бирикмесинин биринчи вице-президенти Мавлянжан Абдураззаков Тажикстандын Тышкы иштер министрлигинин "Кыргызстанда этникалык тажиктер кысымга кабылууда" деген маалыматын төгүндөдү.
