"Эркин Европа/Азаттык" радиосунун Борбор Азия боюнча баяндамачы Брюс Панниер "Азаттык" менен маегинде чек ара жаңжалдарын чечүүдө Шанхай кызматташтык уюмунун ролуна жана эки өлкөнүн тең чыр-чатакта курал кодонуп жатканы канчалык кооптуу экенине токтолду.
Улуттук коопсуздук комитетинин төрагасы Камчыбек Ташиев кыргыз-тажик чек арасындагы ок атышуу жөнүндө Тажикстандын күч түзүмдөрүнүн жетекчилери менен сүйлөшкөнүн кабарлады. Атайын кызматтын башчысынын видеосун Region телеканалы жарыялады.
“Азыр Тажикстандан чыктым. Гүлистан, Исфара шаарларына барып, алардын жетекчилери менен жолугуп келдим. Ятимов Саймумин Сатторович жана бардык күч түзүмдөрүнүн жетекчилери менен жолугуп, ок атууну токтотуу боюнча чечимге келдик. Азыр комиссия түздүк. Ага Баткен облусунун губернатору, милиция, УКМК башчысы, Чек ара кызматынын жана ИИМдин башчыларынын орун басары кирди. Азыр Кызыл-Бел чек ара бекетинде ишти башташты. Атышууну токтотуу боюнча биз бардык жерге команда бердик. 1-2 саатта толук бойдон токтотобуз деп ойлойм”, - деди Ташиев.
Кыргыз-тажик чек арасындагы соңку кырдаал боюнча Кыргызстандын Коопсуздук кеңешинин катчысы Марат Иманкулов "Азаттыкка" учкай маек курду.
