Дайынсыз болуп жаткандардын арасында 1995-жылы туулган Сатыбалдиев Майрамбек да бар. Анын үч баласы бар, эң кенжеси беш айлык. Ал соңку убакта эндиктин тамырын казып сатып, иштеп жүргөнүн атасынын иниси Мамадалы “Азаттыкка” айтып берди:
“Анын атасы – агам мурда кайтыш болуп кеткен. Майрамбектин келинчеги, үч баласы бар. Кийинки убакта бош эле жүрдү. Анан үй-бүлөсүн багайын деп эндик казып сатып иштеп жүргөн. Алар эмне болуп көчкүнүн алдында калганын так билбейбиз. Эртең тик учак менен куткаруучулар келет деп жатышат. Ошондо чоо-жайы так билинет деп күтүп жатабыз. Апасы Бишкекте болчу, Манап деген иниси менен жолдо келатышат. Тилек деген агасы да Орусияда болчу, ал да эртең келип калат”.
Саламаттык сактоо министрлигинин Жалал-Абад облусундагы координатору
Махмаджунус уулу Өмүрбек Чаткалда тоодогу каргашадан кийин алты киши дарыгерлерге кайрылганын, алардын үчөө ооруканага жаткырылганын "Азаттыкка" билдирди.
"Чаткал районундагы кечээги окуядан кийин алты киши кайрылган. Алты киши тең амбулатордук жардам алып, кайра кетишкен. Бүгүн алардын үчөө Чаткал жалпы дарыгердик практикалык борборуна кайра келип, үчөө тең жаткырылды. Алар: Максатбек уулу Элдияр, Нарымбаев Жумамидин, Нарбеков Бакытбек. Азыркы учурда алардын абалы туруктуу, ооруканага кайрылгандагы диагнозу - жеңил даражада үшүк алган.
Чаткалдагы кар көчкүдө калгандардын экөө Башкы-Терек айылында жашаган бир тууган ага-ини экенин айыл башчысы Кубаныч Орозбаев "Азаттыкка" билдирди.
"Кийикбаев Кайырбек 1978-жылы туулган. Ал эми иниси Кийикбаев 1986-жылы туулган. Алар тоого барып, ушундай иштер болуп кетти. Азыр айылда Өзгөчө кырдаал министрлигинин куткаруучуларын күтүп отурабыз", - деди Орозбаев.
Кийикбаевдердин 1993-жылы туулган иниси Чынарбек көчкүдөн аман калган. Дайынсыз болуп жаткандар Каныш-Кыя айыл аймагындагы Коргон-Сай, Башкы-Терек, Кайың-Суу жана Жаңы-Базар айылынын тургундары экени маалым болду.
17-октябрда Чаткал районунун акими Алтынбек Сеңирбаев кырдаал боюнча “Азаттыкка” маалымат берип, көчкү коркунучу дагы деле бардыгын, андыктан куткаруучулар үчүн кооптуу болуп жатканын билдирди.
“Ал жакка баруу мүмкүн эмес, көчкү кооптуулугу азыр деле бар. Өзгөчө кырдаал жарыялаганбыз. Ал жакка техника жөнөтүү да кыйын болуп турат, көчкү алып кетиши мүмкүн. ӨКМ менен тик учакты сүйлөшүп жатабыз, ал бүгүн аба ырайына байланыштуу уча албайт. Эртең учуруу боюнча макулдашып жатабыз. Азыр техникаларды чыгарып, коопсуз жайларда жолдорду тазалай берели дедик”, - деди Сеңирбаев.