Борбордук шайлоо комиссиясы (БШК) бир мандаттуу Ош округундагы шайлоодон четтеткен талапкер Максатбек Маматкулов Бишкектеги Биринчи май райондук сотуна кайрылды. Бул тууралуу ал өзү "Азаттыкка" билдирип, БШКнын чечимине макул эместигин айтты.
"Чыгарган чечимдери мыйзамсыз. Анткени ал үгүт жүргүзгөндөргө тиешем жок. Алар өздөрү да азыр түшүндүрмө берет. Алар 19 үгүтчү деп жатат, андай үгүтчүлөр дагы жок. Азыр Биринчи май райондук сотуна арыз жаздык соттун чечимин күтөбүз".
БШК 26-апрелде Максатбек Маматкуловдон сырткары Бекмурза Эргешовдун дагы талапкер деген каттоосун жокко чыгарып, жарыштан четтеткен. Анда мекеме Маматкулов үгүт өнөктүгүн каржылоого байланыштуу мыйзам талаптарын бузганы аныкталганын билдирген.
Мунун алдында блогер Ыдырыс Исаков Эргешовдун штабында мамлекеттик кызматкерлер жүргөнү тууралуу видео жарыялаган. Көп өтпөй бул окуяга байланыштуу шаар мэриясы айрым кызматкерлер иштен алынганын, кээ бирлерин жумуштан бошотуу сунушу, айрымдарына эскертүү берилгенин кабарлаган.
28-апрелде №2 Баткен, №7 Ош жана №9 Кара-Суу бир мандаттуу шайлоо округдарында Жогорку Кеңештин депутатын мөөнөтүнөн мурда шайлоо өтөт.
Жалпысынан үч округда 30 талапкер катталган, алардын бирөө гана (Ош шаарында) аял. (DSh)
