Орусияда Гипер ылдамдык системалары боюнча илимий-изилдөө ишканасынын мурдагы башкы директору, техника илимдеринин доктору, 76 жаштагы Александр Куранов «мамлекетке чыккынчылык» деген айыптын негизинде жети жылга эркинен ажыратылды.
Санкт-Петербург шаардык сотунун 18-апрелдеги өкүмүнө ылайык, жаза мөөнөтүн ал катаал тартиптеги абакта өтөп, 100 миң рубль айыппул төлөөгө милдеттүү болот.
Куранов 2021-жылдын август айында кармалган. Жалпыга маалымдоо каражаттары (ЖМК) ал илимий иштеп чыгуулар тууралуу мамлекеттик купуя сыр камтылган маалыматты чет өлкөлүк жаранга өткөрүп берген деп айыпталып жатканын жазып чыгышкан.
Куранов – 120 илимий иштин автору, ал аэрокосмостук ишканаларда эмгектенген окумуштуулардын ишин координациялачу, эл аралык форумдарга катышчу жана бир нече жыл "Аэродинамикадагы термохимиялык жана плазмалык процесстер" деген темада Орусия-АКШ эл аралык симпозиумдарын уюштуруп келген.
Соңку жылдары Орусияда бир нече илимпоз жана мамлекеттик кызматкер чыккынчылыкка айыпталып, купуя сыр материалдарды чет өлкөлөргө өткөрүп берген деп жоопко тартылды. (RK)
