Кыргызстанда мамлекеттик органдардын рейтинги жарыяланды. Бүгүн 20-июлда өкмөттүн биринчи жарым жылдыктагы ишинин жыйынтыгы талданып, Министрлер кабинетинин төрагасы Акылбек Жапаров өлкөнү өнүктүрүүнүн 2026-жылга чейинки улуттук программасын аткаруу планы 554 иш-чарадан турарын, азыр анын 92си аткарылышы керек болсо, 71и (77%) бүткөнүн билдирди.
Жапаровдун айтымында, мекемелердин ишин баалаган мониторинг атайын иштелип чыккан ыкманын негизинде жүргүзүлдү.
“Мыкты” деген баага 11 мамлекеттик орган – Саламаттык сактоо, Айыл чарба, Билим берүү, Тышкы иштер, Социалдык камсыздоо, Энергетика министрликтери, ошондой эле Баткен, Жалал-Абад, Ош, Нарын облустарынын, Бишкек менен Ош шаарларынын жетекчилиги татыды.
Сегиз мекеменин иши “жакшы” деп бааланды. Алар – Экономика, Каржы, Ички иштер, Экология, Санариптик өнүгүү министрликтери жана Ысык-Көл, Чүй облустары.
“Канааттандырарлык” деген баага сегиз мекеме – Маданият, Транспорт министрликтери, Талас облусунун жана Жарандык авиация агенттигинин жетекчилиги татыды.
Ал эми Архитектура, курулуш жана турак жай-коммуналдык чарба мамлекеттик агенттиги менен Инвестиция боюнча улуттук агенттиктин ишмердиги "канааттандырарлык эмес" деп бааланды.
Жапаров Кыргызстанда быйыл биринчи жарым жылдыкта экономиканын бардык багыттарында өсүш болгонун айтты. (RK)
